xabel diz que dalgún de los díes en que tuvo en clas deprendió conceptos básicos sobre como funcionaba l’internet. aquel día precisamente falábase de qu’anque un servidor sufriere un ataque aquello nun diba afectar al funcionamientu del conxuntu de la rede, poles múltiples interconexones ente los nodos y otres cuestiones binaries que nun paga la pena esplicar.
xabel diz que depués del corte del youtube del domingu, provocáu pola censura paquistaní a esti sitiu, la rede ye entovía más insegura, non son coses del phising y de los virus, pa la llibertá. ya sabíemos del poder de les corporaciones multinacionales y los estaos pal control de la navegación pero’l puntu de que dende un país cualquiera, una persona cualquiera, pueda desconectar un espaciu de referencia obliga a que se tengan que reformular les teoríes, y les práctiques, de la rede.
xabel diz que la rede evolucionó más rapidamente que la historia global de la humanidá, véase’l rápidu enriquecimientu neolliberal, les crisis bursátiles posteriores, nun periodu increiblemente curtiu. too ello nun nuevu mundu caracterizáu pola teórica ausencia de control, anque como vemos nel exemplu anterior, cualesquier puede tener el control y tou control ayenu a la colectividá ye malo.