xabel diz que dalgunes vegaes ye bono mirar pel ventanu pa ver lo que pasa fuera de casa, pensar en cómo ye posible que'l segundu partíu de la izquierda abertzale, patriota, aralar busque aliances con ezker batua, izquierda xunida, de cara a les prósimes elecciones. les dos organizaciones tienen representación parlamentaria y saben que d'esta, futura, alianza la so representación va medrar. qu'esisten matices no que defenden unos y otros ta claro pero cómo se puede esplicar que n'asturies eso sía cuasi imposible, y nun se refier xabel a partíos de llaboratoriu.
xabel camienta que n'asturies izquierda xunida la dirección d'anguaño, mesmo del pca como d'ix, taríen capacitaos y respaldaos pa dar pasos na mesma llinia que la so homóloga vasca apostar por una coalición col nacionalismu asturianu. diz xabel que lo mesmo qu'aralar y eb renuncien, posponen, a puntos non coincidientes de los sos programes, n'asturies de nun esistir un nacionalismu cátaru, hai bonos y malos y l'oxetivu ye ser el meyor, esa coalición pudiere ser posible anque...
xabel diz que lo mesmo que nel nacionalismu hai un sentimientu albixense. dientro d'ix, y del pca, hai sectores, minoritarios, que siguen teniendo al nacionalismu como un preséu de la burguesía p'acallar la voz del proletariáu, coincidentes nello con bona parte de la fsa; asina como al mou de ver de xabel una forma d'alianza cola burguesía non identificada col país que ye'l 98% de la qu'hai n'asturies. la cuestión ta en dexar la búsqueda de la perfección pa otros tiempos anguaño lo importante dafechu ye tener la representación afayadiza pa condicionar la próxima reforma del estatutu.

xabel diz nun entender a la patronal del sector chigreru asturianu, xusto nel momentu nel que va entrar en vigor la llei de restricción de les llibertaes de los y les fumadores deciden esixí-y al gobiernu asturianu la prohibición de fumar en tolos chigres del país. diz xabel que la propuesta vien ensin creditu de nenguna clas dao que tiempu abondo tuvieron pa facer les reformes nos sos locales, y a una selmana de la entrada en vigor de la llei nun ye momentu d'esixir pa llibrate de lo que nun te dio pola gana facer.
xabel diz nun entender el posicionamientu d'izquierda xunida de siero respectu a la hipotética independencia de llugones, respectu de siero. xabel considera que la cuestión de la creación d'un nuevu conceyu, n'asturies por más que s'empeñen nun esisten los municipios, cuando l'esistente ta a puntu de medrar más allá de los cincuentamil ciudadanos/es ye un suicidiu pa los dos entes locales. sicasi xabel camienta que los y les qu'han decidir sobre'l futuru de llugones nun son otros más que los que viven, sofren, llugones. malos pegoyos pa medrar, a menos d'un añu pa les ellecciones, los que planta izquierda xunida de siero.

Dos amantes dichosos no tienen fin ni muerte,
nacen y mueren muchas veces mientras viven,
tienen la eternidad de la naturaleza.
pablo neruda

xabel diz que cuando nun hai muncho de lo que cuntar enxemes en cuando dalgún collaciu unvia-y dalgún recorte de prensa, pa eso de rellenar el blog y que nun quede atrasáu y ensin actualizar. la de güei ye, otra vegada más, sobre los cursos branu de la granda.
gracies a estos cursos de branu acabamos de saber qu'al xefe d'estáu de la ciudá del vaticanu ratzinger, alies benedictu xvi, la horchata presta-y tanto que ta a puntu de roblar un alcuerdu con un distribuidor. esto pasaba na apertura d'un "cursu" nel que falarán de lo complicao de la organización del alcuentru de les bones families que se ficiera esti añu en valéncia.
xabel que pasen los minutos nesta primer entrada col ubuntu instaláu nel discu duru del computador y la esperiencia bien pago la pena. pasín a pasín hasta escaecese d'esos ventanos qu'hai qu'iguar tolos años pa que nun entren les corrientes.

y como siempre los proyectos ensin realizar, y non por falte de ganes

xabel diz que cuando'l ciudadanu madrileñu y cabeza de llista de la fsa-psoe al parlamentu español ilustra ya esplica al pueblu asturianu nin tip y coll nin gila nin el mesmu urdaci s'averen a cuntar chistes tan falsos. esplica'l señor cuesta "que asturias se encerraría en sí misma y correría riesgos en su competitividad como región si, contracorriente, se obsesiona en la oficialidad". pos nada, suerte que tienen catalanes, vascos, navarros, gallegos, baleares qu'encerraos en sí mesmos son competitivos y añu tres añu medren perenriba d'asturies. ye normal qu'esta xente, que representa a un país que conoz de dos selmanes al añu, diga coses que rayen cola normalidá de la intelixencia que se-yos tendría de suponer a los y les representantes públicos.
xabel diz que, dao que fala de turistes, dalgunos díes de branu ye guapu dir peles cais d'uviéu como un turista más. nuna tarde xabel alcontró dos cais peles que nunca nun caminara, rincones bien guapos d'una ciudá que día tres día s'escaez y esborria pa sumise. de les coses qu'al xabel turista más-y manquen ye l'entornu de la foncalda diz xabel que nun ye comprensible qu'una de les construcciones civiles más importantes de la edá media europea tea neses condiciones, escaecida y sólo alcordada pol nome d'una cai.
alcuérdase xabel d'un proyectu, cuantos proyectos ensin realizase, col bardu errante pa facer una ruta turística, empobinada a la mocedá, demientres el branu l'uviéu más escaecíu dende lo industrial a lo medieval. amuesar esa ciudá la que dicía'l ferreteru que nun quería ser. Y ye que si nun conocemos lo de nueso, si lo de nueso mos da vergoña como vamos ser competitivos. encamiéntavos xabel a lleer les declaraciones d'eneko y iker pou , acaben d'abrir la via más difícil del mundu n'urriellu, en lnesobre la importancia de los picos y lo poco que se valoren n'asturies

xabel diz qu'esti añu si pudo tar na fiesta de las nieves en puertas, anque sabe que desvía l'atención de los temes xenerales de los que s'ocupa esti blog tamién sabe de bien de xente que llee esti blog por ser xabel d'onde ye y pa una cosa de la que ta arguyosu nun la va tapecer.
diz xabel que de la que llegó a puertas sintióse foriatu non porque naide nun lu conociere sinon porque elli nun conocía a les munches persones qu'andaben pel puelu, diose cuenta de que nun yera que la xente s'escaeciere d'elli nin nada pol estilu sinon cenciellamente turistes qu'había pel barriu vega y rodiada. a les 2200 del vienres caminamos pa la capiella de las nieves, en paruga, les moces cantaron lo del recibimientu y corriendo pa la verbena, qu'acabó como ye vezu cola cabera actuación de los tres del collanáu qu'anunciaron la so despedida en conxuntu y la prósima aparición de los sos trabayos en solitariu.
el sábadu apareció un cura mozu, venticinco años, con barba y alzacuellos (colo bien que parecía tar aquello del vaticanu segundu), el párrocu afáyase más en bulnes y en puertas poca xente lu echaría en falta asina que toos contentos. entamó la procesión, o manifestación relixosa ensin permisu de delegación del gobiernu, col ramu y demás tradiciones como les y los mozos del puelu vistíos col traxe y eses coses. puyóse'l pan y a xintar. a les 22 volvió entamar la verbena que duró hasta les 6. tranquilidá y munches cares conocíes a les que saludar.

xabel diz que, depués d'esta selmana d'ociosidá ainformática, torna coles mesmes ganes de siempre a facer dalgunos comentarios a la realidá social asturiana y mundial. diz xabel que viendo dalgunos de los proyectos de futuru d'areces pal país centru de microsoft, mausoléu de fernando alonso; faen que s'alcuerde xabel daquello del grandonismu asturianismu. xabel como cantaba dixebra diz premios principiegos sóbranos dinero n'asturalia.

xabel diz qu'entovía nun alcontró la diferencia ente los primeros tiempos de tele oviedo y los de televisión del principado de asturias, sacantes los medios ténicos y económicos. diz xabel nun entender tantu alderique parlamentariu p'acabar faciendo una televisión ayena al país, y que vuelve a cayer nos defectos de les televisiones xeneralistes. alcuérdase xabel de los debates na xunta xeneral nos que les organizaciones ciudadanes asoleyaron los sos criterios pal ente de comunicación, un mes depués del so entamu nenguna de les propuestes feches ta realizada. sabe xabel qu'un mes ye poco tiempo como pa calificar una obra pero esti entamu nun da bones vibraciones de cara al futuru. y la llingua? como diz areces elli foi'l que más fizo pol bable pero ensin tocala nun vaya ser que se ruempa como'l pañolón o'l brazu incorruptu de teresa de cepeda y ahumada.
lumes nunca mais

mañana crónica de la fiesta de las nieves de puertas, cabrales, que yá se-y escaecía a xabel

xabel diz que na anuncia del día, el bloque por asturies abandona la coalición con izquierda xunida, hai coses que nun ye a entender, n'especial de la visión positivista de rafa palacios con declaraciones como "dase la meyor coyuntura politica pa la presencia del asturianismu d'izquierdes y l'asturianismu cultural na escena política asturiana". piensa xabel que pudiere ser un convite pa entrar nes negociaciones con ias o con andecha, partíos que bona parte de la militancia del bpa ya conoz. camienta xabel que la executiva del bpa nun valorará como positivos, nel conxuntu del gobiernu, estos tres años pa la cultura asturiana; y si ye qu'asina lo estima entós meyor apagar y salir corriendo.
xabel diz que nun entiende'l porqué entós de les prieses por escoyer al candidatu a la presidencia. val qu'andecha yá decidiere otra vuelta más escoyer a david rivas, pero'l bpa tenía tanta priesa, y necesidá, de dar a saber dalgo qu'anque predecible nun había falta?
xabel diz que'l camín que-y llega agora al bloque por asturies, ensin el sofitu de la so matriz (ix), va ser enforma duru y les puertes au pique van tar trancaes. rafa palacios tien fecho un bon trabayu na dirección de l'axencia de cooperación, polo que dicen les organizaciones que trabayen nesi ámbitu, pero eses organizaciones nun van sofitar a un grupu que nun tenga nenguna opción d'algamar representatividá. el bloque, a la fin, volverá otra vuelta más con izquierda xunida d'otra forma nunca nun s'entendería la so esistencia.