xabel diz que la derecha tiembla cuando la ciudadanía algama derechos, glayen los sos medios a la llucha polos privilexos, d'unes condiciones del vieyu réxime. la esquierda uruguaya va de vacances, escriben en el mundo, ha ser terrible'l trabayu de corresponsal d'un mediu neolliberal n'américa llatina.

xabel diz qu'esta fin de selmana'l mimetismu ente psoe y pp foi tan claru que lo normal sería que ficieren llistes conxuntes.

xabel diz echa cuentes: 2500 en 9 meses por fíu o fía +500 del ordenador y adsl +120 de los llibros de testu +240 al mes por emancipase primero de los 30 +400 por facer la declaración de la renta =3760€. y ye a lo que lleva neoliberalismu, l`estáu xestionáu con criterios d`empresa, repartu de beneficios a fin d´añu. estáu español gastu públicu n´educación (añu 2000) 4,5%; estonia mesmu gastu 7,5%; austria 5,8%; dinamarca 8,2%; portugal 5,8% (datos de le monde diplomatique "europa momentos decisivos").

xabel diz qu'un bon apunte pa los y les antroxeres ye que n'asturies carnaval suena a coche.

xabel diz qu'agora que la humanidá ta a puntu d'algamar el surdimientu de la vida igual vien la ilesia y tira los cimientos.

xabel diz que nel prósperu, ya inmune a les crisis económiques, estáu español hai xente que pa vivir tien que llevase'l cable de les catenaries anque dende la empresa dicen que hebo un fallu. un estudiu que diz que'l 25% de los neños viven na probitú. un gobiernu que nun tien presupuestu pal salariu social y sí pa regalar ordenadores. y ye que too depende del sistema operativu.

xabel diz que mañana francisco frutos depués d'aniquilar el psuc y el pce, pactar col psoe más neolliberal, cumple 69 años, y depués de tan frutifera carrera política diz que nun se va xubilar, igual que paco l'ursurpador.

xabel diz qu'igual qu'hai cientocincuenta años el zar y les monarquíes europees axuntaben les sos fuercies pa lluchar contra'l movimientu proletariu, anguaño la ilesia y les oligarquíes europees llevanten les sos armes pa combatir los avances sociales.

xabel diz que dixo mao: "pal añu 2001, a entamos del siglu xxi, la china esperimentó cambeos entá mayores. va ser un poderosu país industrial socialista. y asina ha ser".

xabel diz que depués de tiempu d'autoesperimentación na llectura de blogs decantóse por facer entraes con menos lletres y más enllaces.

xabel diz que esti titular podría ser real n'asturies de nun cambiar les coses: "una llingua menos".

xabel diz que mal lo van llevar los pitos monteses, si ye que-yos puede dir peor, pa llegar hasta escocia como anuncia na so edición de güei la voz de asturias. recuerda'l titular a aquella frase d'hasta que les ranes, que tamién lo pasen mal, críen pelo, y como tou'l mundu sabe'l pitu montés nun vuela, y cada día que pasa tien más posibilidaes de desapaecer, de nun correxise les actuaciones previstes pola fsa-psoe nes aries de poblamientu. la fundación seo/birdlife publica un perinteresante estudiu sobre la cuestión.

xabel diz qu'esta entrada númberu 301 faese na ciudá del non pasarán, esi glayíu, esi llema de resistencia cívica y democrática, republicana, col que madrid resistió la sabaxe envestida del fascismu. xabel diz que ye una casualidá facela nesti llugar de la meseta ibérica, nel que la ultraderecha lliberal, la que mancha'l nome del lliberalismu cívicu proclamáu ente los sieglos xviii y xix, arrasa con cualesquier avance social.
xabel diz qu'una de les más importantes llabores qu'esisten cuando se quier reflexar, dende un puntu de vista subxetivu, ye escuchar les conversaciones, imaxinar d'au ye la xente que ta sentada a la to vera, ya seya nel metro de madrid o nel tua de llatores. asina xabel diz que la señora d'enfrente del metro, tenía rasgos d'asturiana, que nun ye nin meyor nin peor pero ye, y espresiones llingüístiques asturianes, falaba ella del recorte de llibertá de la clas obrera, que coses cuando les sos traces identificábenla dafechu cola supuesta esperanza.
xabel diz qu'anque siga sintiéndose estranxeru nesta ciudá, que lo ye, poco a poco entama a vela como un espaciu agradable, quiciaves por tener equí más amigos que n'asturies, anque claro eses amistaes, como la señora de rasgos asturianos y lo que dicía, seyan lleendes urbanes.

xabel diz que llegó a eslovaquia un día depués de qu'esti país européu entrara dientro del alcuerdu schengen, polo que los sos ciudadanos pueden circular llibremente pel territoriu de la ue y d'otros paises non ue que tamién lu roblaron. esa tarde darréu quitar les fronteres austria decidió prohibir la circulación per 20 metros de la carretera qu'axunta los dos paises ente les 22 y les 06 hores, torgando asina la llibertá de movimientos que debiere dar esti tratáu, utilizando pa ello una feble escusa.
xabel diz que güei ta en frankfurt-hahn volviendo pa santander, pasa'l control d'equipaxes, nun ha amuesar la so documentación; cuando de la que diba pa bratislava si lo tenía que facer, ye más, hasta la terminal ye diferente. depués enllénse d'arguyu diciendo que toos somos europeos, toos colos mesmos derechos, y dalgunos hasta con más obligaciones y controles que los demás, la diferencia, polo que se diz ta nel tiempu d'adaptación, anque la realidá amuese que la europa occidental sigue mirando con temor, infundáu, al este.
xabel diz que la vieya europa sofre la so propia paranoia a convertise nel referente políticu mundial, representada en cuestiones como l'aprobación d'un tratáu de reforma institucional aprobáu a espaldes de la ciudadanía europea, refugáu'l primeru non polos símbolos si non poles polítiques antisociales derivaes del mesmu. xabel diz que bien parez que de la utopía d'una unión federal, política y ciudadana de los pueblos d'europa solo queden les povises escaecíes por unes polítiques nes que lo importante ye la llibre circulación del capital y non la construcción d'un espaciu de referencia na defensa de los derechos de la ciudadanía.