xabel diz que'l reconocimientu del derechu d'usar les llingües d'asturies na alministración de xusticia amuesa, a les clares, que se pueden dir dando pasinos, ensin perder el norte de la oficialidá, de cara a la normalidá democrática del país. valledor, conseyeru de xusticia, demostró que con voluntá política, y de negociación, ye posible que l'asturianu tea presente na vida alministrativa cola normalidá que merez. xabel diz reconocer, positivamente, los avances de les dos conseyeríes xestionaes por izquierda xunida nel ámbitu del asturianu. sicasí la falta de cohesión d'un gobiernu, del que'l partíu mayoritariu nunca creyó, fizo qu'estos avances nun se reproduxeren, como había ser, nel restu de la xestión gubernamental.
xabel diz que la capacidá de negociación de valledor contrasta cola del rector de la universidá asturiana, sí esi de la sorrisa peremne, personaxe que naide nun se puede explicar como llegó al cargu/os depués de ver como continuamente fracasa en cumplir col mandatu parlamentariu de la creación de la filoloxía asturiana.
xabel diz qu'otra de les noticies del día bien podría ser que servanda garcía, conseyera d'agricultura, pesca y demás actividaes, diz que'l bocarte de la griega se puede xintar. xabel, ensin entrar en cuestiones que nun-y competen, camienta que primero prefier ver a servanda xintando los pexes y depués yá reflexonara sobre la conveniencia de comer unos pexes de los que nun se sabe la causa de la muerte.

xabel diz que según pasa'l tiempu parez como si les sociedaes occidentales retrocedieren nes llibertaes cíviques. nun ye esti un pensamientu esclusivu de xabel, na edición de setiembre de le monde diplomatique hai artículos sobre la cuestión, ye una cenciella observación de lo que ta socediendo. nel estáu español la comunidá de madrid o l'aytu. de la capital del reinu cancelen, censuren, una obra de teatru porque al so director nun-y presta españa, n'alemaña cancelen una ópera por miéu a les represalies relixoses, n'asturies dalgunos alloriaos piden pesllar asturnews porque bertín, el dibuxante, primero fizo una viñeta que sentó mal a andecha y agora fae otra que sienta mal al pas. xabel diz qu'a la fin ratzinger tien xente abondo pa poner nel tribunal de la santa inquisición.
xabel diz qu'agora son les obres de teatru, les óperes, los dibuxos de bertín, mañana serán les coversaciones en casa... la cosa ta n'entamar depués los y les amantes de los tixories yá tarán sollertes pa que lo que nun-yos presta nun se vea.
xabel diz que depués del discursu nel que'l presidente areces anunció tolos proyectos d'autopistes, estaciones d'esquí, puertos, refuxos, banzaos... llega poseidón y gomita más d'un millón de pexes nel sable de la griega. qué coses más rares pasen nel país cola tasa de co2 más alta d'europa.

xabel diz que'l vienres de la que s'apagaren les lluces entamó una llucha pol derechu a espresase nel idioma de cada ún. a un de los qu'apaecía na pantalla metiéren-y la balloneta pel piscuezu por nun dicir el so nome na llingua del imperiu... darréu entamaba una guerra de guerrilles pa la llibertá d'irlanda. entama asina la última película de ken loach 'el vientu que cañica la cebada'.
xabel cuando veía aquella escena alcordóse de les pallabres d'ana rosa, conseyera de cultura y vocera del gobiernu autonómicu, onde dicía que la oficialidá del asturianu sedría una imposición. xabel diz que l'auténtica imposición va vese cuando'l 27 d'ochobre los militantes de xunta moza tengan que comparecer a un xuiciu y el o la xueza-yos nieguen el derechu a espresase nel so idioma. lo mesmo que tamién ye imposición, o censura, que nun estáu democráticu por manifestar les opiniones puedas acabar delantre d'un tribunal. asina avanza asturies.
de la que les llucen volvieron tar enceses marchó xabel a tomar unes pivo y dalgo que xintar. entró, otra vuelta más, nuna discusión conceptual sobre la normalización y normativización de los idiomes, y n'especial del asturianu. volvió salir el casu de los tribunales, ye de lo que más teme la ciudadanía, qué pasaría cuando llegue la oficialidá? -entrugáben-y a xabel- elli retrucó que nun habría problema que nesi momentu l'academia de la llingua diba enllenase de solicitues, voluntaries, pa facer la preba de conocencia. y l'usu de l'asturianu normlizaríase dientro de los xulgaos, lo mesmo qu'énte la sociedá. claro ta si nun se da'l pasu previu, oficialidá, entós la preba de conocencia seguirá pero ensin miles de solicitues.

pivo>cerveza

xabel diz que nun piensa movese pa dir a san llázaro a sentir a melendi, siéntelo pol real uviéu pero xabel cansa d'eses estrelles mediátiques d'anguaño. xabel pensaba n'aquellos tiempos nos que los músicos podíen compartir cantares, escribir cantares pa otros, robase los cantares, aquellos tiempos nos que la mayoría sabía componer y versar. xabel tuvo escuchando, esti llunes, a los secretos, faltaba enrique, alcordando emociones que sólo los que saben escribir son a rescamplar. discúlpase xabel con loquillo pero coses del tayu... sicasí tien ganes de de dir a l.a.
xabel diz que lo mesmo que los músicos analfabetos tán de moda na política asturiana pasa lo mesmo. lo qu'importa ye la música, repetida y machacona, la lletra con tener un estribillu facilón y llambión val, total naide nun poner atención pal testu enteru. sólo asina se puede entender les declaraciones de la cúpula de la fsa sobre l'asturianu.
xabel diz que como nun hai quien los mueva, de les sos posiciones, parez que vien pel oeste gordon con ganes d'armar xaréu. y sobre movilizaciones entrúgase xabel si les organizaciones más importantes númericamente del conceyu abiertu pola oficialidá fadrán un llamáu a los y les sos militantes, pa participar na manifestación del 18 de payares, o preferirán aforrar en sellos. diz xabel que cuando tas nel güeyu del huracán hai calma pero alredor too ta en movimientu.

xabel diz, depués de sentir y lleer al presidente vicente abrir la reforma, que nun será, del estatutu d'autonomía, que lo de la fsa pasa de tolos mátices de la hipocresía. nun ye que sía una sorpresa les reformes anunciaes pol presidente del conseyu de gobiernu, que yá se sabíen, lo malo ye que mos quieran vender una reforma asemeyada a la de ceuta y melilla como un trunfu equiparable al del estatutu balear, catalán, gallegu, valencianu... sicasí la fsa sola nun puede imponer una reforma estatutaria y eso, cuando menos, ye un aliviu.
xabel diz que si pudo esistir un puntu clave na reforma del estatutu, que va tardar ser, esi ye'l d'ovidio sánchez "si la situación del asturianu nun va cambiar pa que facer una reforma". ovidio repite la clave electoral, la so cercanía, como estorbu pa entamar una reforma, de xuru que tien les cuentes echaes, anque la fsa tamién y piensa seguir xugando con ventaxa.
xabel diz que lo único seguru na reforma del estatutu ye la posición d'izquierda xunida, mantendrá la que siempre tuvo, sí a la oficialidá. izquierda xunida ha xugar un papel de negociación. queda saber si jesús iglesias tará al altor d'una negociación estatutaria, amás de sabese responsable del futuru de la llingua del país. a la fin xabel diz que quien diba dicir qu'ovidio pudiera pasar a la historia como'l presidente qu'oficializó l'idioma envede como'l representante asturianu que foi a más beatificaciones. y ye que los dogmes de fe nun tienen razón científica vicente.

xabel diz que cuando'l vienres prendió la radio y sintió a ibarra nun se decató de qu'esi yera'l día d'estremadura. mientres el presidente extremeñu falaba de los problemes de la so comunidá y de les iniciatives que se taben desenvolviendo, asina como dalgunos absurdos sobre la unidá del reinu y eses coses, el presidente tini taba de rodielles delantre la virxe cuadonga.

tini taba de rodielles de la que la tpa inauguraba la so programación matinal. por supuestu había ser na misa cuadonga, y ye que si-yos ponen un obiespu delantre corren detrás d'elli como burros detras d'una zanahoria. la tpa entamó como lo que ye una serviciu al serviciu de los poderes fácticos y na asturies de tini areces la ilesia sigue siendo un poder al mesmu nivel que los demás. llaméntase xabel de la inesistencia d'un benito juarez na historia d'asturies.
xabel diz que la tarde del día d'extremadura n'asturies pa la tpa foi dalgo revesosa. encargaos d'amuesar la vida asturiana, siempre y cuando sía respetuosa colos mensaxes del gobiernu. la presencia de la pita de la xunta, que non d'andecha como'l fiu de dalgún amigu de los bables escribiere, fizo que l'asturies bucólica diere pasu a los odiosos comerciales y a la descordinación técnica. por supuestu la culpa nun ye de los profesionales de la tpa la responsabilidá de que se suspenda una emisión en directu por evitar les crítiques ye esclusiva del aparatu censor que controla la programación.

xabel diz qu'entamen les emisiones de la radio pública asturiana, con perdón de radio llangreo. Tini areces, como dende la so llegada al poder, entámala con radio sele, otra vuelta más la gran perxudicada. nun ye cuestión de que la rpa vaya facer les sos emisiones n'asturianu, como debiere, sinon que va ocupar un sitiu nel dial bien averáu al de la radio n'asturianu, tan cerca que radio sele va tener que cambiar el so dial. día d'asturies ensin radio n'asturianu, pero como tamos n'asturies tampoco ye d'estrañar, o llegó'l momentu de dicir yá ta bien!.
xabel diz sigue con otres coses del gobiernu asturianu como les de la presidenta del ridea y, conseyera de cultura, ana rosa migoya cola so negativa a retirar los símbolos fascistes de la universidá llaboral de xixón. xabel diz qu'agora que les competencies de xusticia tán trasferíes tamién ye'l momentu de que'l conseyeru de xusticia retire, ordene, la retirada de la vidriera col escudu fascista de la sede del tribunal superior de xusticia. lo último ye que van retirar los que nun estropien la estructura.
xabel diz que lo de los premios príncipe d'asturies ye dalgunes vegaes d'alloriar. la selección española de basket ganó'l mundial esti domingu, allegróse xabel, y premiu príncipe. pero y si envede españa ganara grecia, tendríen tamién el premiu? hai vegaes nes que parez que los de la fundación quieran dir a la lluna cola pareya gües.
y como mañana ye'l día covadonga equí una estrofina:

La Virxen de Covadonga,
la Virxen de Covadonga
ye piquiñina y galana,
ye píquiñina y galana;
ye la flor de les muyeres,
ye la flor de les muyeres
y ente les xanes, la Xana,
y ente les xanes, la Xana.

xabel diz sentise como la flor que l'aire la lleva, como la flor que l'aire la lleva vien el mio amor a rondar to puerta, como la flor que l'aire la lleva.
como la flor qu'el fríu la seca, como la flor qu'el fríu la seca vien el mio amor llorando a to puerta, como la flor qu'el fríu la seca.

tradicional asturiana

xabel diz que cuando esti domingu lleía en el plural la noticia sobre la portada de el mundo quedara friu y con ganes de ver la última de pedro jota y, del deliriu paranoide de la derecha española. xabel depués de lleer l'artículu biográficu sobre esta bona persona que siempre collaborara, cola policía, pa evitar el tráficu de sustancies, un gran rapaz que tuvo'l problema de les males compañíes, lo que nun evitó que siguiere fiel a les sos responsabilidaes cíviques votando, como siempre, al pp. en fin que xabel encamiéntavos la llectura d'esti nuevu culebrón de pedro iota porque bien lo merez.
xabel siguió viendo'l mediu d'espresión de la derecha española hasta atopar un artículu na revista del domingo, esos suplementos avecen tener más llibertá, sobre la desactualización de los llibros testu. daquella xabel alcordóse de les sos, inútiles, incursiones nel espaciu de llibros d'escuela del hipercor de les saleses pa ver los manuales de llingua castellana y les sos referencies al asturianu. anque fechos y col nihil obstat de la conseyería d'educación na mayoría d'ellos la fórmula utilizada ye illegal, esto ye anterior a 1998. l'artículu de el mundo falabo sobre'l tiempu que se diba esperar pa sacar a plutón de la llista de planetes viendo que munchos de los materiales nun faen referencia nin a la presidencia de zapatero, nin a ratzinger, nin a munchos de los acontecimientos que tán marcando'l presente.
xabel diz que de xemes en cuando abre'l google earth y suaña con otru llugar na tierra, búscalu y nun ye quien a ah.ayar nada como'l de so, sicasí xabel sigue buscando anque sólo sía por si acasu.

xabel diz que dalgunes vegaes ye bono mirar pel ventanu pa ver lo que pasa fuera de casa, pensar en cómo ye posible que'l segundu partíu de la izquierda abertzale, patriota, aralar busque aliances con ezker batua, izquierda xunida, de cara a les prósimes elecciones. les dos organizaciones tienen representación parlamentaria y saben que d'esta, futura, alianza la so representación va medrar. qu'esisten matices no que defenden unos y otros ta claro pero cómo se puede esplicar que n'asturies eso sía cuasi imposible, y nun se refier xabel a partíos de llaboratoriu.
xabel camienta que n'asturies izquierda xunida la dirección d'anguaño, mesmo del pca como d'ix, taríen capacitaos y respaldaos pa dar pasos na mesma llinia que la so homóloga vasca apostar por una coalición col nacionalismu asturianu. diz xabel que lo mesmo qu'aralar y eb renuncien, posponen, a puntos non coincidientes de los sos programes, n'asturies de nun esistir un nacionalismu cátaru, hai bonos y malos y l'oxetivu ye ser el meyor, esa coalición pudiere ser posible anque...
xabel diz que lo mesmo que nel nacionalismu hai un sentimientu albixense. dientro d'ix, y del pca, hai sectores, minoritarios, que siguen teniendo al nacionalismu como un preséu de la burguesía p'acallar la voz del proletariáu, coincidentes nello con bona parte de la fsa; asina como al mou de ver de xabel una forma d'alianza cola burguesía non identificada col país que ye'l 98% de la qu'hai n'asturies. la cuestión ta en dexar la búsqueda de la perfección pa otros tiempos anguaño lo importante dafechu ye tener la representación afayadiza pa condicionar la próxima reforma del estatutu.