xabel diz que cuando se dio cuenta de que yera 25 d'abril solo faltaben 7 minutos pa que llegara'l 26 d'abril. xabel diz que como tolos 25 d'abril fai una alcordanza a la última de les revoluciones democrátiques, una alcordanza al pueblu portugués. una alcordanza a la que, como naquel día del 73, josé "ceca" afonso pon les lletres y les pallabres.

em terras
em todas as fronteiras
eeja benvindo quem vier por bem
ee alguém houver que não queira
trá-lo contigo também

xabel diz que contra tou pronósticu los qu'apostamos por que'l gobiernu d'areces sólo pensaba en formigón y autovíes perdimos l'apuesta. la viceconseyera de mediu ambiente ta acabante de presentar l'autovía peatonal del cordal. más de 400 kilómetros de víes verdes que van permitir dir d'un llau al otru d'asturies ensin pisar un metru d'asfaltu.
xabel diz que la propuesta, que ye mui bona, afita la esistencia de la comunicación énte los diferentes pueblos del país, por aquello de qu'ente valle y valle la xente nun s'entendía pol bable que falaba; que dicir si hai un continum viariu ente los dos conceyos del sur d'asturies más llonxanos, cosa que nun ye nueva
xabel diz qu'ensin desmerecer la propuesta, que remarca mui bona y positiva, la conseyería tamién habría de s'esmolecer por caltener y meyorar les señes de les rutes de montaña del país. bien que vengan cola superpista, pero les pequeñes tamién esisten.

xabel diz qu'al poco de prender l'ordenador atopó con un collaciu que taba pela rexón del mediu oriente. aprovechando la situación y, pola curiosidá provocada pola ociosidá de los domingos, dio-y por pregunta-y si nesa rexón tamién dedicaben el domingu pa folgar. la respuesta foi que non, colo que xabel depredendió que los capitales bursatiles por más que pongan confiamos en dios nun-y faen casu y trabayen tola selmana.
xabel diz que l'otru día comentában-y de nun sabe quien que trabayaba pal principado. xabel pensando na emigración, respondió qu'elli tamién conocía xente que trabaya pel principáu. dicía-y xabel qu'allá cola tema del turismu había muncho trabayu y bonos sueldos y que yera normal que la xente marchara, cuando equí nun hai lo mesmo. depués d'un cachu xabel diose cuenta de qu'esi principáu del que-y falaren nun yera'l de los pirineos, si non que ye'l nome que recibe l'alministración asturiana.
xabel diz que munches vegaes cansa de sentir qu'al país de so dalgunos nómenlu rexón, otros principado, otros comunidá, provincia, escaeciendo a la fin la más guapa de toes, la que lu sitúa nel mundu, la que lu fae ser especial, asturies.

xabel diz que, siguiendo col monologuista bable gabino de lorenzo, sorprende-y abondo l'esmolecimientu de la fsa pola postura del pp sobre l'asturianu na prósima reforma del estatutu. asina esti domingu'l secretariu de la fsa pidía al pp qu'esclariara la so posición respeutu al asturianu, nun xestu que nun dexa de ser otra cosa más que buscar los votos del antiasturianismu.
xabel diz que dende la xunta pola defensa de la llingua tamién se pide a la derecha asturiana la necesidá d'aclariar la so posición respeutu del idioma.
xabel diz que la fsa nun tien nada que temer, que la so posición de partíu antiasturianista ye inamovible, amás de ser un claru componente ideolóxicu. xabel diz que l'alcalde uvieín, yá amosó la so postura en rellación al asturianu que ye non a la oficialidá, nuna cena cola nobleza, asina que pa qué tantu ruidu d'agua cuando les coses siguen como taben? y ye que n'asturies anque''l riu suene l'agua nun llega.

xabel diz qu'esti mes en le monde diplomatique, vuelta a la francia republicana, apaez un artículu tituláu "más de 16 millones de salarios baxos n'europa", refierse a la europa de los 15 porque si se falara de la de los 25 la millonaria cifra medraría enforma más. del artículu una frase "l'allargamientu de la xornada llaboral ye contraria a la creación de nuevos empleos, y por sí sola nun pue estimular una medra d'actividá si'l repartu de los ingresos mantiense ensin cambios".
xabel diz que pasu a pasu'l neolliberalismu devora los derechos de clase, alcontrando un ermu ideolóxicu que ye'l de la "izquierda" oficial europea que nunca nun se llevantó ideolóxicamente na defensa de la clase trabayadora; zapatero avanza nos derechos civiles, ye verdá, pero zapatero sigue coles mesmes polítiques económiques, de suelu... qu'aznar, y anguaño parez ser el referente européu de l'antigua socialdemocracia.
xabel diz que frente a esa "izquierda" muerta llevántase, cada día con más fuerza, la voz de la izquierda alternativa, la que fuxe de los personalismos mesiánicos y del populismu, la que de siguío asoleya, y fae por desenvolver, los cambios afayadizos p'algamar una sociedá meyor, obxetivu cimeru de la izquierda.

xabel diz 30 años dende la llegalización del partíu

xabel diz que los artículos de les últimes selmanes de gabino de lorenzo en la nueva españa bien s'ameyen a cuando pablo de tarso cayó de la burra y s'alcontró col dios muertu de los cristianos. xabel diz que gabino de lorenzo depués de 16 años de mandatu n'uviéu alcuentra a felechosa y descubre que l'asturianu amás de pa cuntar chistes tamién val pa escribir cartes en periódicu, eso sí con un estilu que recuerda al de los monólogos, tolos respetos pa los y les monologuistes.

xabel diz que nestes dates de reflexón, nes que los y les cristianes cellebren l'asesinatu del so llíder, llega a uviéu el congresu de la sindonoloxía pa estudiar científicamente el pañolón de la cámara santa de la catedral. la sindonoloxía ye un conxuntu de métodos pseudocientíficos que s'empleguen pa llegar a una conclusión yá definida, y que nun ye otra que demostrar que la sábana de turín y el pañolón d'uviéu tuvieron en dalgún momentu en palestina y que cubrieron a xesús el de nazaret.
xabel diz que siguiendo'l meme de gonzález y gonzález diz que tipografía la verdana, una web imprecindible manches solares y un blog n'otra llingua mundo iconoclasta. siguiendo'l meme l'avisu pa caleyando, rapiega y pal galán d'esta villa.

xabel diz que cada cuatro años parez que la seronda entame na primavera, y ye que'l rexistru de partíos vive nesti tiempu un llabor que sólo conoz cuando lleguen les elecciones. asina nes últimes selmanes l'actividá de creación de partíos políticos foi bien intensa.
xabel diz que mientres qu'hasta febreru sólo había una andecha d'un día pa otru apaecen otres cuatro, poniendo difícil a los y les hipotétiques votantes de la organización. xabel diz que por partíos y opciones polítiques que nun falte, hasta en cabrales acaben de formalizar el partido independiente de cabrales, cola fin de, supón xabel, defender los intereses xenerales de la población cabraliega.
xabel diz qu'otres sigles nueves n'asturies son, ente otres, seríen l'"asamblea de ciudadanos por la izquierda" rexistrada n'uviéu dos díes depués de la cellebración del congresu del pce n'asturies, el pinsi de siero que nun quería enseñar al candidatu por miéu a les represalíes, ye que la mafia de siero ye de temer, y asina una llarguísima llista que dientro d'un tiempu va corresponder a un partíu cada tres ciudadanes o ciudadanos.

xabel diz que como tanta otra xente busca na llectura un entretenimientu, un mou de deprender, d'entender meyor les coses del mundu. xabel diz qu'hai un tiempu, nel desorde caóticu del so cuartu, entamó a separar los llibros, clasificándolos non por xéneros o autores sinon ente los que se lleíen una vegada, los que nunca nun s'acabaríen, los que nun s'acababen por querer tenelos pa tola vida, y los que s'acababen pa volver a lleelos pasáu un tiempu.
xabel diz que de los llibros que nunca s'acabaríen anda "el señor de los anillos", de tolkien, por más qu'al mundu-y preste xabel nun foi a pasar del tercer capítulu. ente los llibros que nun s'acaben polo guapo, y prestosos, "baudolino", d'umberto eco, ocupa un sitiu destacáu, un capítulu cada seis meses, nunca más, depués detiénse la llectura pero coles ganes de que pasen otros seis meses.
xabel diz que de los llibros que se lleen una vegada podríen ser citaos munchos, tantos que sería difícil, pero la verdá ye que si hebo un llibru que-y marcara daveres, y sólo lleere una vegada, a xabel esi foi "1984" de george orwell. xabel diz que de los llibros que rellee cada ciertu tiempu destaca "cien años de soledá" de garcía márquez, de la que recién acaba asoleyase una nueva edición. xabel diz que s'entruga que lleerá la xente que pasa pel blog.

xabel diz que llega la escuela de seronda con un foru sobre la blogosfera asturiana. pa quien nun lo sepa, la escuela de seronda ye un espaciu de formación alternativu qu'añalmente organicen los conseyos de la mocedá del nuesu país. xabel diz que la seronda ye l'espaciu más afayadizu au mos poder axuntar los y les blogues d'asturies, amás d'otra xente que sintiere lo que ye un blog y entovía nun desenvolvió la so idega.
xabel diz que nestos dos díes los y les blogues asturianes vamos poder participar nun foru nel que podremos analizar les esperiencies nel mundu de los blogs d'otros países, analizar y proponer sobre la nuesa blogoesfera, sobre'l nuesu papel na asturies del 2007, el papel de los blogs en llingües minorizaes y perseguíes, vamos qu'una perbona oportunidá pa facer un autonalís críticu de lo que tamos desenvolviendo.
xabel diz que cuenta cola participación de toos y toes les que tamos trabayando en facer que l'asturianu tea presente, y al mesmu altor porcentual, na blogosfera. xabel diz qu'ensin que se-y escaeza que la inscripción se pue facer nel web del cmpa.