xabel diz qu'hai un tiempu dixo que'l so blog nun yera un campu de marte, que yera un espaciu nel que amosaba les sos reflexones sobre diferentes cuestiones que podíen incidir en dalgún grau na sociedá, más les cuestiones sobre les qu'escribe xabel que la opinión de xabel.
xabel diz que como cualesquier persona con un mínimo d'información conoz el prósimu mes cellébrense les primeres elecciones primaries n'izquierda xunida, una organización política na que milita xabel y que tien más d'un millón de votos nel conxuntu del estáu; anque'l resultáu electoral nun se vea reflexáu pola dispersión y repartu de representantes congresuales; esto ye unes elecciones nes que se va decidir la voz política d'un énte que tendría más población qu'asturies.
xabel diz que de los dos candidatos sólo conoz a ún, a gaspar llamazares, conoz la so aición, la so política y la so defensa de los intereses d'asturies y de la clas trabayadora, amosaes bien d'ocasiones mesmo na so etapa n'asturies, cola defensa de los derechos llingüísticos sobremanera o nel espaciu sindical de les comisiones obreres, la defensa de los valores republicanos... xabel diz que cuando mande la papeleta va facelo pensando n'asturies, pensando nel socialismu, na lliberta y el federalismu, va facelo por gaspar.

xabel diz que la selmana pasada entamaba a funcionar la ponencia del futuru máximu testu llegal d'asturies, l'estatutu. una reforma que llega tarde, y na que los derechos civiles de la población asturiana entrense otra vegada más en xuegu.
xabel diz que los representantes del pueblu asturianu tienen ante ellos la posibilidá d'iguar la torga de los derechos fundamentales d'una nación, d'un conxuntu d'homes y muyeres qu'a lo llargo de la historia conformáronse como pueblu en tornu a unes característiques culturales y polítiques estremaes, y al tiempu venceyaes, de les de los pueblos de les sos fronteres.
xabel diz que d'entrada de 45 diputaos solu 4 apoyen el desenvolvimientu de los derechos civiles y colectivos, los d'izquierda xunida. nes otres reformes el pactu estatutariu, a la baxa, ente psoe y pp, torgó la voluntá d'autogobiernu, la necesidá de reconocer los derechos llingüísticos, condenó a esti país a la tercera clas d'un tren qu'otros sí supieron aprovechar. xabel diz qu'izquierda xunida, como siempre fizo, nunca nun va sofitar un estatutu a la baxa, un estatutu como'l que quieren psoe y pp que siga negando derechos, condenando a esti país, a esta nación, al últimu vagón del desarrollu.

xabel diz qu'esta selmana'l parlamentu español aprobaba una de les lleis más importantes de la hestoria de la reciente democracia nel estáu, la llei de la memoria histórica. una llei que como diz l'informe del grupu parlamentariu d'iu-icv nun ye un puntu de llegada si non un puntu de partida.
xabel diz que les reacciones por esta llei; anque durante tola llexislatura la reacción ye un presente, por más que s'envuelvan nos símbolos constitucionales; nun van tardar n'apaecer. solo d'esa forma ye comprensible que'l xefe de la curia española anunciara la inmediata beatificación, que nun dexa de ser un limbo, de 400 sacerdotes y monxos católicos muertos na guerra civil, la construcción d'una basílica en valéncia o coses como la del cura de nava que diz que solo va quitar la ominosa placa de los muros de la ilesia hasta que'l plenu del ayuntamientu nun vote por unanimidá a favor d'ello. el cura diz que la ilesia non la puso, solo dio'l permisu... suerte que ye una placa porque bien podría ser un garrote, o un potru de tortura...
xabel diz qu'en dellos conceyos les coses son d'otra forma, anque nun taría de más que l'estáu mirara lo que subvenciona, iniciatives como les de quitar los títulos honoríficos a franquistes han vese como una iniciativa de normalidá. o ye que nel pp tamién s'oponen a que daqué xefe de campu de concentración nazi siga ostentando cruces de fierro y títulos del 3 reich?
como diz el cantar "nosotros queremos la paz, la paz con dignidad"

xabel diz que viendo les noticies a la hora de comer ablucaba sintiendo a pio garcía escudero abrir los cuatro sellos del apocalipsis nel senáu español. xabel diz que dicía escudero que si se taba rompiendo españa, que si la bandera, que si la monarquía... too coses mui guapes y poles, que se sepa, nunca naide nun votó.
xabel diz que la siguiente noticia yera'l presidente del pp, mariano rajoy, emitiendo un llamamamientu a la participación de los españoles nos actos del prósimu 12 d'ochobre. mesmo'l primeru como'l segundu bien paecíen ser actores, actuando ún como calvo sotelo y l'otru como jose antonio primo de rivera. xabel diz que de xuru ye la comparación, terrible, que se pue facer d'esti casu.
xabel diz qu'ayer el presidente del conseyu de la mocedá d'asturies pedía que s'ampliaren les medíes de fomentu del empléu pa la mocedá. facienda sitúa a asturies énte les comunidaes onde la mocedá cobra menos. xabel diz que por eso sí se vota.

xabel diz qu'anden per españa mui lliaos con toles temes que tienen, que si la corona, que si l'himnu... asina pasen les coses que cuando della xente s'aconceya acaba na arrestada, ensin sabese mui bien a qué, artículu de la constitución, s'atener.
xabel diz qu'en chile anque los xueces, tamién tarden, acaben detener a la familia del alumnu d'escuela de franco, pinochet, por lladrones. nel estáu español el congresu, a propuesta d'iu-icv acaba de votase una resolución pa que trenta años el patrimoniu d'esta familia vuelva a les manes de quien siempre fue, que ye del estáu.
xabel diz qu'asina les coses cada país paez aplicar les sos normes respeutu a los réximenes que condenaron al pueblu a époques escures, ensin nenguna llibertá, bono sí la económica que como diz chomsky ye lo que cuenta. al mesmu tiempu entrúguen-y a xabel pol réxime cubanu, qué-y va dicir, que va criticar, xabel a un pueblu que dende va yá más de 50 años escoyó un réxime democráticu non lliberal, pos eso cada pueblu ye llibre pa decidir el so futuru, lo que nun ye asumible ye que dende dalgunos supuestos ideolóxicos, económicos, se quiera echar atrás la decisión del pueblu. asina que güei con fidel, mañana con quien decidan los y les cubanes viva cuba llibre!

xabel diz qu'anda la ilesia mui preocupada poles paternidaes, lo que ye una ccosa enforma grave teniendo grave teniendo en cuenta que quien la inspiró polo que sabe anguaño tampoco tenía padre conocíu, polos métodos científicos.
xabel diz qu'asina la ilesia asturiana hai unes selmanes despedía a ún de los sos oficiantes, avézase dicir asina cuando a un trabayador lu echen del trabayu, por tener una relación estable con una persona de diferente sexu, entrando en frontal confrontación, a la fin too ye una llucha lo que mueve'l mundu, col votu de celibatu, que non castidá, al que son obligaos los oficiantes de los sos rituales.
xabel diz que güei la conferencia episcopal de toledo, como l'alcazar, diz que les ayudes a la natalidá han empobinase a aquellos neños y neñes que tengan padre conocíu. xabel diz-y a la ilesia española que siga l'exemplu que predica y devuelva toles donaciones feches a nome de xesús el de maría, de padre desconocíu.

xabel diz qu'españa por más que los preámbulos digan ye un estáu monocolor, ensin forma, ensin variedá. xabel diz alcordáse d'hai bien d'años, sí munchos anque xabel seya mozu, cuando sintía a unos amigos mexicanos falar de les sos cuarenta canales de televisión. elli, ablucáu, dicía-yos, con vergoña, que sólo tenía dos, eso cuando nun taba en cabrales a onde nun llegaba la uhf.
xabel diz que peles mañanes cuando dan el resume de les portaes de los principales medios de prensa escrito con sentir una yá algama conocencia abondo como p'alvidrar el conteníu de les demás portaes. xabel diz que qué dicir cuando envede portaes son titulares, por nun entrar a falar, más si cabe, de la cuestión televisiva.
xabel diz qu'esti miércoles va asoleyase un nuevu periódicu, cola voluntá de ser un diariu d'izquierdes, ensin disimular. nun tardo'l tiempu, enantes de que s'asoleyara pa que la gandaya de la pretendida izquierda dixere que nun se trata más qu'una campaña preelectotal orquestada pol gobiernu español; xabel diz-yos qu'allá ellos, o como diría l'otru "ya t'oyí navaya", si prefieren facer xuicios de valor a analizar la rialidá. xabel, enantes de que lu asoleyen, da-y la bienllegada a publico, depués yá se verá.

xabel diz que sí que ta n'izquierda xunida d'asturies, que ta nel partíu comunista d'asturies, que sigue creyendo nun estáu federal asturianu, que sige teniendo la defensa de los derechos de la ciudadanía, y d'asturies como nación, como'l so másimu obxetivu.
xabel diz que depués d'años de reflexón llegó a la conclusión de que l'únicu proyeutu de futuru pal asturianismu políticu, p'asturies, ye izquierda xunida; nun foi un calentón, non, y eso sábelo perbién xente del so entornu, lo mesmo que saben que cuando se produxo la situación de comunicar la so intención de siguir lluchando n'otru espaciu políticu, esta vegada con voz y presencia na sociedá asturiano, tampoco foi una cuestión cenciella pa xabel. nun significaba, repite xabel, abandonar el so compromisu militante y activista, la nueva etapa abrióse d'una forma esperanzadora y ilusionadora que sigue presente.
xabel diz que nun-y presta que'l so trabayu seya anuncia, que tampoco-y presta ver como xente que nun lu conoz fala sobre elli en términos que rayen la corrección. xabel diz que si hai dalgo que sí-y presta dafechu ye saber que toles sos enerxíes tán, agora como ayer, puestes na mesma llucha, la del reconocimientu d'esti país. xabel nun cuestiona les decisiones de naide, nin siquiera les comenta anónimamente; naide, camienta xabel, tien tampoco porqué tirar la piedra y agachar la tiesta al ver pasar a xabel.

xabel diz que según un estudiu cada dos selmanes desapaez una llingua nel mundu: una cultura, una forma de vida, milenios de convivencia social. una de les coses más estrañes d'esti proyeutu ye la so focalización en delles aries del planeta, entiéndese sí que ye más afayadizo, colo que europa nun ye zona d'estudiu, quiciaves los resultaos sorprendieren. anque pa la fsa la necrolóxica nun pase d'un avance nesi falsu internacionalismu, como falsu socialismu, que dicen defender.
xabel diz qu'esta selmana conocíase la declaración de la ría del eo y de los ozcos como reserves de la biosfera, con parques eólicos incluyíos. dalgún mediu asturianu llegaba hasta'l casu de vincular esta declaración cola recién visita del presidente del gobiernu español a ún de los conceyos d'ozcos, tal paecía como si envede los ozcos fueren las h.urdes, y envede un zapateru fuere un rei.
xabel diz que lo mesmo que gabino convierte a uviéu nun plató de cine, nun hai más que fachada na ciudá, tini fae por facer lo mesmo n'asturies, convertir esti país nun escaparate, nuna mentira, nun cuentu nel que sobra xente, quiciaves un bon relatu pa dickens. (y cada vez menos sales de cine)

xabel diz qu'ayeri gregorio peces barba nuna entrevista en el comercio dicía que la llingua nun taba na constitución ente les llingües si non que'l so espaciu taba ente les modalidaes llingüístiques. la cuestión radica en que la constitución española solo menciona una llingua, l'español, y al restu nin les noma.
xabel diz que'l pretendíu exerciciu d'hipnosis de dellos sectores de la fsa-psoe, sobre la población asturiana, en referencia al reconocimientu de los derechos llingüísticos ralla l'esperpento sobremanera cuando lleguen a repetir continuamente un discursu que, anque falsu o non adecuáu a la verdá, acaben por creyer.
xabel diz qu'asina les coses nun puede estrañar que dende la derecha asturiana, probes de los y les que pensaron que nel pp diben tener abellugu políticu pa la vindicación de los derechos individuales, l'argumentación llingüística seya la mesma, ensin matices siquiera, que la de la fsa. asina estebán greciet na so columna en lne escribía que "los rapacinos probes tendrán bable; / y los ricos, inglés, ye impepinable. / ¡dizlo el profesor Sosa!". xabel diz qu'esa ye la so idega de la igualdá de la ciudadanía, un modelu de ciudadanía col que nun se puede tar dalcuerdu, porque anula la mesma condición de ciudadanu y ciudadana.