xabel diz que mientres veía'l caberu capítulu de la última temporada d'expediente equis comentóse una data que-y llamó en forma l'atención. la fecha referíase al caberu día de la era actual según el calendariu maya; según ésti'l 22 d'avientu de 2012 la humanidá va tener que decidir ente la so desapaición como especie pensante o la so integración col universu. esi día amás d'eses decisiones tan importantes vamos tar bien sollertes a la llotería de navidá asina como al solsticiu d'iviernu, que nel hemisferiu sur ye equinociu de branu, que da la casualidá qu'aveza ser los 22 d'avientu de cada añu.
xabel recibió dos mails que-y prestaren especialmente, el primeru ye referente a la gripe aviar y la so correspondiente manipulación por parte del gobiernu de los eua, el segundu ye sobre la festividá de san xudes tadéu que debe ser el patrón de los imposibles y que pa que se cumpla l'imposible has unviar el mesmu mail trece vegaes, a xente diferente claro. reconozo que la estampita y el deséu d'una bona collacia de que yo tuviera, tamién, la oportunidá d'algamar dalgo que quiero ye dalgo perimportante y que ta perenriba de toles coses. y el de la gripe aviar ye muncho meyor y tenéis que velu. sinceramente paez-y a xabel más creible la hestoria de los trece correos de san xudes tadéu que la de la gripe o al fin de la era materialista nel 2012.
xabel miró los sitios web de los enllaces, depués de velos nun ye difícil algamar la mesma conclusión qu'elli.
la verdá ta al otru llau del hiperenllaz. y más allá del hiperenvenceyu una mirada diferente a judas tadeo

afirma xabel que yá llegó dafechu l'iviernu, considérase xabel observador de la realidá y faelo notar.
lleía xabel una entrevista al filósofu español gustavo bueno na que dicía que l'orixe de la nación española alcontrábase na dominación romana y de les bones infrastructures comunicatives que los romanos desenvolvieron na península. les calzaes romanes forxaron la identidá de la nación española, según el señor bueno, como l'autovía minera va forxar la nación asturiana. les afirmaciones de bueno, siempre buscando la polémica, nun dexen de ser contribuciones a un debate artificial, económica y electoralmente mui rentable pa dalgunos grupos interesaos.

diz xabel qu'a elli nun-y presta pintar d'azul les llargues nueches d'iviernu, presta-y a xabel sentase a ver como'l cielu bermeyu entama escurecer hasta tapecer dexando solo delles cerilles que resplandecen lloñe. anguaño si miráis pal sur, perenriba la madalena, vais poder ver una estrella blanca enforma guapa. son coses pequeñines que presten. nunca nun paró xabel a cuntar les estrelles, y eso que diz que tiempu tien abondo, sabe xabel que puede mercar el nome d'una estrella y de xuru que de la mercar fadríalo con una que tuviera nel otru hemisferiu p'asina nun la poder ver y echala siempre de menos.