xabel diz que l'otru día de la que miraba el país, cualesquier otru periódicu con páxines d'internacional tamién valía, lleía que la medra de la producción d'etanol yera la causa de la subida del preciu de les tortes de maiz en méxico. xabel diz qu'en méxico la torta de maiz ye un alimentu básicu, que-y lo digan al bon chavo del 8, y qu'esi encarecimientu taba provocando que munchos, miles güei mañana quien sabe, de ciudadanes y ciudadanos mexicanos entamaben a pasalo mal. la situación provoca la entrada de maiz americano, yanqui, en méxico au compite col sofitu de les subvenciones, que como rara avis sostienen sectores de les economíes neolliberales.
xabel diz que na siguiente páxina del diariu, o de cualesquier otru con sección d'internacional, apaecía l'anuncia del entamu del foru de davos, qu'esti añu tratará la cuestión del cambiu climáticu. el día mesmu del entamu george bush proclamaba la intención de reducir el consumu d'enerxíes non renovables nun 20% en 10 años.
xabel diz que na parte d'abaxo de la páxina de davos un cuadrín falaba d'un conceyu en nairobi. el so entamu nun ye noticia nin pa la bbc, polo menos na so versión iberoamericana nin na sección africana de la versión británica, anque la emisora británica si ufra un especial sobre los biocombustibles que suben el preciu de les tortes de maiz.

xabel diz que la tarde d'esti llunes foi, quiciabes, una de les más guapes de tou l'iviernu, atrás quedaba'l tener que dir a trabayar nel national express por mor de lo que llovía, la verdá ye que la tarde yera l'avezada pa sentase en daqué cafetería y echar una güeyada a un llibru.
xabel diz qu'hai unes selmanes que-y regalaren un exemplar del llibru de la historia del atenéu obreru de xixón, conmemorativu del 125 aniversariu de la fundación. xabel diz que depués de lleer el testu, bono relleelu, quedó-y un tastu amargu. l'atenéu obreru de xixón algamó una biblioteca tala que competía coles de la universidá y la de la biblioteca xovellanos. cuando xixón perdió la llibertá, los llibros allumaron les tardes d'aquel prietu ochobre de 1937.
xabel diz que siempre admiró les corrientes ateneístiques, como fontes de pensamientu y reflexón, a la par d'espacios de convivencia y compromisu cola sociedá na que s'encuadren. xabel destaca, d'ente toes, una frase del atenéu "y a pesar de arbitrariedades y persecuciones, siempre mantuvimos encendido el fuego de la inquietud por las ideas del orden, de justicia y libertad".

xabel diz qu'hai unos meses falaba de la tardanza del gobiernu asturianu n'entamar la concesión de les canales de televisión dixital; pasa'l tiempu averámosmos al apagón analóxicu, y les conseyeríes encargaes de presentar los proyectos nin gurguten.
xabel diz qu'esta nueche nun alderique en teleasturias nel que participaben la diputada diana camafeita y el diputáu fernando goñi, cola ausencia de representantes del psoe, como yá tienen tele propia pa los debates... los dos diputaos coincidíen na necesidá de presentar al plenu de la xunta xeneral una resolución qu'afalara al entamu de los trámites afayadizos pa la concesión d'estes llicencies.
xabel diz qu'una de les coses que van pasar cuando se concedan les llicencies ye que, por pura matemática, habrá una canal n'asturianu (d'ente les quince o venti posibles p'asturies). xabel diz que mui posiblemente la canal nun vaya ser pública, a nun ser que se refuercen les posiciones favorables a la normalización del idioma (en tolos aspectos) dientro de la xunta xeneral. sicasí xabel diz qu'entovía ta presente aquella primera aición, hai yá 7 años, del gobiernu d'areces y les sos relaciones cola comunicación.

xabel diz qu'areces tien de vese bien desesperáu pa a 6 meses de les elecciones sacar un discu pa regalar a los emigrantes, bono un discu solu non sinon 50.000. xabel diz que la fsa ta destacándose por repetir los sos discursos, en parte pa convencer a les y los asturianos y d'otru llau p'autoconvencese.
xabel diz que más allá de les empreses qu'editaren el discu, el beneficiu ye lo que cuenta que diría chomsky, que ye secundario, la cuestión vuelve a tar na cercanía de les elecciones autonómiques. elecciones que vienen axustaes, por más que se molesten en dicir que van pola mayoría absoluta, y nes que los votos de l'asturies del exterior pueden dar sorpreses; n'especial cuando hai un bon trabayu detrás, valoración por supuestu subxetiva pero reconocida por munches y munchos.
xabel diz que nel estáu español cuando se fala d'emigración y votos mírase pa galiza; ye más na escuela, alcuérdase, siempre se dicía morriña y non señardá. xabel diz qu'hai años lleía que sólo en bruseles había una colonia asturiana con una población asemeyada a la de pravia. xabel diz, y camienta naide nun se va llevar les manes a la tiesta, qu'areces siente de cerca l'aliendu d'ovidio, pero lo que-y preocupa daveres ye tener que volver a repetir gobiernu con izquierda xunida

xabel diz que por más que la rede paeza un, nuevu, mundu ensin fronteres estes siguen esistiendo. mientres que los estaos abandonen cualesquier intentu de frenar la lliberalización empresarial, esos mesmos estaos faen por imponer unes llendes a una actividá que nun s'alcuentra fisicamente en nengún espaciu. asina les sos ocurrencies empobínense a frenar la llibertá de la ciudadanía.

xabel diz que na so amada francia, anque por otres coses, el parlamentu de l'asamblea de la república vien aprobando, data tres data, lleis que restrinxen la llibertá de les y los usarios de la rede y qu'en munchos de los casos busquen una aición penalizadora del usu de la rede, mediante la imposición de regles a los y les ciudadanos que son ayenes a les de les persones xurídiques.
xabel diz que la globalización, aquella cosa de la que tanto se falaba, entama a igualar les represiones al usu de la rede. xabel camienta que si non nun se podría esplicar que los intentos de censura del web seya'l mesmu n'irán, n'india, china, nel brasil, o en corea.
xabel diz que tando asina les coses a naide nun-y pue estrañar la idega de mercar sealand por parte d'un grupu suecu. contradiciones que faen que pa navegar en llibertá pel ciberespaciu seya necesario tener un trozu de tierra. anque tamién, porqué non, nun será la primer tortuga del ciberespaciu? eso yá, de xuru, quedará a la voluntá de la nueva ciudadanía, que coses otru berbixu del sistema que val pa saltase les sos normes.

xabel diz que pela mañana llamáronlu pa que mirara la páxina 18 de la voz de asturias del 12 de xineru. había una ¿noticia? sobre les elecciones del 13 de xineru al cmu. xabel abrió l edición dixital del periódicu y alcontró la nota, firmada pola redacción. depués de lleer la nota xabel deduz les coses que vienen darréu:

a) la redacción de la voz de asturias fae un xuiciu de valor sobre les candidatures al afirmar qu'una de les dos candidatures "ye más progresista".

b) la redacción de la voz de asturias nun comprueba la composición de la candidatura, incluye a una entidá suplente, y dexa ensin citar a una entidá candidata.

c) la redacción de la voz de asturias diz d'una asociación que ta integrada por jóvenes del pp, vuelve a emitir un xuiciu de valor. lo mesmo sobre lo que se diz del conceyu d'estudiantes nacionalistes y la so supuesta vinculación con izquierda asturiana.

d) l'últimu párrafu entovía ta siendo analizáu llingüísticamente. poro entovía nun hai deducción.

xabel diz que nun taría de más qu'enantes de meter cualquier cosa que llegue a la redacción polo menos tengan el procuru de contrastar la información, a nun ser que se trate d'un mediu sensacionalista, asina como comprobar que les frases tengan sentíu, y nun pasen coses tan gafes como la publicada esi día.
xabel diz que la cercanía a la noticia permite distinguir claramente los errores, o manipulaciones, na mesma. tamién diz xabel que con una nota de prensa d'esi tipu lo más normal sedría facer por constrastala, asturies nun ye tán grande y conocémonos toes y toos. sicasí'l llabor de los profesionales de la voz aveza ser bien bonu, un fallu nun puede condenar a un mediu pa la eternidá, cenciellamente tien de ser un puntu a correxir. (perdón poles 106 pallabres de más)

xabel diz que ye tarde, tanto qu'el camión de la basoria cuantayá que pasó llevando atrás lo que pensaba que yá nun valía, trastos vieyos qu'ocupaben un espaciu afayadizu pa meter trastos nuevos. que depués de dalgún tiempu, cada vegada más curtiu, tresformaríense en trastos vieyos pa volver a entamar col xiru de la rueda.
xabel diz que nun sabe como, nin porqué, pero resulta que s'alcuerda de bien de coses, ye raro porque reconoz que la so capacidá memorística inmediata ye inesistente anque pasaes unes selmanes, meses o incluso años ye capaz de dicir lo qu'otra xente dixere en presencia de xabel. xabel diz que lo bono de la memoria a llargu plazu ye poder facer alcordanza de les pallabres, de los pensamientos. facer valoraciones sobre'l tiempu pasáu, analizar lo cumplío y lo incumplío ye dalgo a lo que toos y toes tenemos derechu a facer. guardar una migayina del nuesu tiempu pa ello, tendría de ser un derechu de toles persones.
xabel diz qu'esi tiempu güei lu dexa pa pensar nun mes d'avientu de 1999, y parez que fuera mañana.

xabel diz qu'ayeri na conferencia de bernardo atxaga, bon trabayu'l del conceyu de xóvenes historiadores, guardó una frase na cabeza que dicía "unos tán nuna oriella o na otra, pero los más tamos en mediu", camienta xabel que nun s'equivoca atxaga al pronunciase d'esa forma cenciella, pero enforma contundente sobre la realidá de la euskalhiri a la que se refería n'euskal pilota. parez-y a xabel que munches vegaes la pasión ciega les nueses ilusiones, llegando a convertise en pesadilles.
xabel diz que respeta, y muncho, a les pesadilles siempre y cuando seyan individuales. hai vegaes nes que pierden la individualidá pa convertise colectives. dientro d'estes últimes ye perconocida la pesadilla qu'entamaba no one would have believed in the last years of the nineteenth century that this world was being watched keenly and closely by intelligences greater than man's and yet as mortal as his own.
xabel diz que daquella yeren les ondes hertzianes les que tresmitíen les pesadilles colectives; la velocidá la mesma que la de la lluz, llimitada sólo pola potencia del emisor. güei, pensar nel mañana nestos casos podría convertise en pesadilla, la potencia yá nun ye fundamental na tresmisión de la pesadilla; güei lo fundamental ye la credibilidá de la fonte, y dos fontes por asemeyaes que paezan nun dexan de tener diferente agua.

xabel diz que s'alcuerda d'hai unos años falando con dalgunos amigos de la tolosa occitana sobre los salarios mínimos n'asturies y en francia acababa por llevase les manes a la cabeza al escuchar la cantidá que se pagaba, como mínimu llegal, en francia. años depués les reformes asumíes pa igualar el salariu mínimu cola norma europea siguen siendo tímides y a mui llargu plazu.
xabel diz que siguiendo con francia, exemplu de tantes coses, república na qu'el primer ministru, dominique de villepin, acaba d'anunciar qu'el derechu a la vivienda transformaráse en daqué esixible; esto ye que l'estáu habrá proveer d'una vivienda digna a los y les ciudadanes que nun la tengan.
xabel diz que lleía, parez-y que tamién esti sábadu, peticiones pa que l'estáu español intevenga pa facilitar l'exerciciu del derechu a la vivienda digna, artículu 47 de la constitución del 78. critícase nestos artículos qu'el desmadre ocasionáu coles lliberalizaciones del suelu respóndese por parte de l'alministración con más lliberalización urbanística. y a too esto xabel entrúgase si los actuales gobiernu y oposición españoles lleeron más allá del artículu 8 de la constitución española.

xabel diz qu'elli nun tien intención nenguna de qu'el so espaciu se convierta nun campu de marte sobre la comisión permanente del cmu, o el mesmu futuru de la entidá. xabel diz qu'el futuru de la institución xuvenil uvieína ha defendese nos diferentes órganos de participación de la entidá y non nos foros o páxines d'internet.
xabel diz que muncha xente utiliza la internet de forma anónima pa espresar lo que d'otra forma nunca nun diríen, quiciavis pola autovergoña de los sos comentarios, quiciavis por recibir en persona una contestación afayadiza. sicasí xabel diz que l'anonimatu nun país como asturies, nunes estructures como les organizaciones xuveniles y nos conseyos de la mocedá ye inesistente, por más que se traten de tapecer nel anonimatu.
xabel diz que si vuelve al conseyu de la mocedá d'uviéu, por si dalguién non lo sabe xabel foi secretariu y presidente del órganu representativu de la mocedá asociao d'uviéu, ye col mesmu ánimu de siempre: representar y defender los intereses de les asociaciones xuveniles d'uviéu, ensin escepción, lluchar pol exerciciu de los derechos de la mocedá y asegurar, y promover, un entornu normal pa la llingua asturiana. y eses coses xabel defenderáles, y argumentará, nel sitiu afayadizu que ye'l conseyu de la mocedá y non nesti blog.