xabel diz que'l tiempu de basar la economía na construcción ta llegando a los sos últimos díes. la crisis, qu'entama a llegar, de les bolses internacionales, puxaes pola de referencia americana, pasu a pasu nesti mundu que nun conoz los descansos nin siquiera los pigazos, faese cada día más clara y con ello la pantasma de la quiebra bancaria aparez con mayor nitidez que nunca.
xabel diz qu'atrás van quedar aquellos tiempos nos que por un chamizu podíen pedir más de 120.000€, algamando quien lu mercara. atrás van quedar los tiempos nos que les bolses medraben a guelpe de créditu blandu en base a la propiedá inmobiliaria.
xabel diz que vien un mal periodu, cíclicu como les sagues celtes. una economía, la del mundu "occidental", qu'entama a carecer de la so teoría de la llibertá del capital, una economía non basada na producción. estaos ensin competencies económiques, entidaes supraestatales que sólo pueden atender a lo que ta pasando faltes de toda capacidá de regulación de los mercaos. el panorama nun ye bono, acaba d'entamar una crisis en metá del gastu ensin pagar. xabel diz que quiciabes la ilesia dexe de ser la mayor terrateniente d'asturies, anque qué va facer la banca con tantu suelu?

xabel diz qu'anque pueda paecer imposible la fsa ye'l modelu políticu de la sede central, lo del federalismu pa ellos ye como'l socialismu, del psoe. xabel diz que cuando toos y toes pensábemos que de la fsa'l psoe por nun sacar yá nun sacaba nin ministros agora resulta qu'algamen hasta modelos políticos.
xabel diz que la decisión de la executiva del psoe d'imposibilitar el gobiernu de la izquierda plural en nafarroa ye la cimera del procesu de desideoloxización al que se vien sometiendo l'antigua socialdemocracia española. la pena a la que se condena a la población de nafarroa, siguir embaxo un gobiernu de la upn, marca ellectoral del pp, pa evitar la entrada de nafarroa bai y d'ezker batua nun gobiernu de coalición de la esquierda navarra nun ye otra más que la del mieu a perder votos, cambien política por resultaos electorales, prefieren cantidá a calidá, y asina van les coses.
xabel diz que pepinho branco sabe muncho de cuentes, dende los sos entamos nel conselho da xuventude de galiza, y depués d'echar les cuentes diose cuenta de que-y salía meyor una escisión del psn, que llegara, qu'un partíu del corte de ciudadanos encabezáu por rosa díez, qu'incomprensiblemente sigue como eurodiputada del grupu socialista anque tea allineada col pp nesos temes que tan bon reditu electoral dan. mientres n'asturies migoya diz que l'estatutu nun ye motivu de preocupación pa la ciudadanía, cómo lo va ser cuando mclaren nun-y para d'armar putaes a fernando alonso.

xabel diz qu'hai unos años fidel entamaba una campaña empobinada al aforru enerxéticu, facilitar a les families cubanes una pota rápida cola que poder facer la comida consumiendo menos tiempu y recursos enerxéticos. xabel diz que dende determinaos sectores occidentales ridiculizóse la propuesta.

xabel diz qu'hai unos años fidel entamaba una campaña, otra, empobinada al aforru enerxéticu, otra, facilitar a les families cubanes bombilles de consumu baxo. xabel diz que dende determinaos sectores occidentales ridiculizóse la propuesta.
xabel diz qu'hai unos meses fidel escribía sobre la xuba de los productos básicos por mor de la producción de cereal empobinada a los biocombustibles, alertaba'l comandante en xefe de los problemes que diba tener la población pa poder algamar los recursos mínimos pa la sobrevivencia. xabel diz que dende determinaos sectores occidentales volvió ridiculizase l'alvertencia del presidente cubanu.

en vano busqué a la princesa

que estaba triste de esperar.
la vida es dura. amarga y pesa.
¡ya no hay princesa que cantar!

juventud, divino tesoro,
¡ya te vas para no volver!...
cuando quiero llorar, no lloro,
y a veces lloro sin querer...

¡mas es mía el alba de oro!

de canción de otoño en primavera

rubén dario

xabel diz qu'estos díes de la que miraba la prensa alcontraba una información sobre dellos y delles xueces, y más funcionarios xudiciales, falaben de la incompatibilidá ente les sos creyencies y la función pública qu'habíen desenvolver. como mártires de la santa y sagrada tradición lo primero pa esta xente ye la so fe y depués la xudicatura. asina dalgunos declarábense obxetores a la llei de matrimoniu, otros a roblar matrimonios, adopciones...
xabel diz qu'hai dos selmanes un xuez daba orde de secuestrar el jueves por una caricatura na que'l fiu del rei taba trabayando cola so muyer. diz l'editorial de la revista de la selmana pasada que'l fechu parez más propiu de cuando s'asoleyaba la revista que del país modernu que mos quieren vender en 2007, nun s'equivoquen. xabel diz que l'otru día'l senador vascu iñaki anasagasti escribía en so blog un artículu críticu cola monarquía que yera durísimamente respondíu mesmo dende'l pp como del psoe, tanto monta monta tanto, na que-y decíen que podía escribir de too menos de la monarquía, menos cuando fuera pa bodes, bautizos y comuniones y coronacionaciones, lo de la elección ye un estáu evolutivu al qu'entá non llegaron.
xabel diz que mal van les coses cuando los funcionarios públicos obxeten la xudicación de les lleis por mor de la so creyencia, que los xueces actúen como perros de presa, que la llibertá d'espresión tea per baxo la esistencia d'una supuesta institución, que les decisiones adoptaes nos ámbitos de la soberanía se xudicialicen por perder les votaciones. suañu d'una revolución allá en 1789 que nun se pudo facer a tiempu.

xabel diz que la fsa vuelve a echar el frenu de la reforma del estatutu, una reforma que pretenden facer a espaldes del publu asturianu, una reforma xestionada como una ampliación de capital de daqué sociedá anónima deportiva porque a la fin pase lo que pase los y les asturianes van siguir siendo asturianos y asturianes.
xabel diz que la voluntá de la fsa de dexar atrás la soberanía del pueblu asturianu nun queda nel casu del estatutu. ayeri la presentación de una modificación a la llei del ente de comunicación, pa que la so dirección seya escoyida nel parlamentu, yera recibida pola fsa como una ofensa. llegando aviltar la decisión del grupu d'izquierda xunida por ser el más pequeñu de los tres esistentes.
xabel diz que mientres lastra exerce d'ariete, el presidente asturianu acondiciona el so nichu nel edificiu con más ventanos que l'escorial, que dicen per xixón, y ye que poco se puede esperar d'un gobiernu que parez l'equipu técnicu d'una sociedá anónima deportiva. queda esperar. d'elli que se sintiere xulio cesar y como nerón acabó ensin pretorianos nel so exiliu braniegu.

xabel diz que si nestos tiempos de les telcomunicaciones y de les mercadotecnies esiste dalgo que desesperé al xéneru humanu eso tien de ser los servicios d'atención al cliente. xabel diz que de primeres la mayor parte de los mesmos son de pagu, poro cuando se quier mercar o reclamar esiste un sobrecoste que nun s'especifica, nos que nun son de pagu les teleoperadores polo normal son cuatro y pases venti minutos colgáu del teléfonu como una cosa tonta, mientres pienses si na tienda atenderánte meyor.
xabel diz qu'asina les coses, y alcordándose d'aquella tarde de navidá en las campinas esperando a un alsa, que como siempre llegaba tarde, llamando pa pidir una información que la probe marroquina que garraba'l teléfono nun sabía por mor de nun tar na base datos, un decidió escacese pa siempre enxamás de los servicios telefónicos d'atención al cliente.
xabel diz qu'años depués hebo volver emplegalos por mor d'un portatil que llegó mal de la fábrica, vueltes y más vueltes; perrecorrer l'estáu, el portatil, de medina del campo a la alhambra y vuelta pal norte, díes d'espera pa qu'a la fin el volviere'l mesmu airis y non el prometíu modelu nuevu, dios que cruz lo de los servicios técnicos que paecen tar na india. y ye que cuando tán a la vera casa o esploten a los y les trabayadores, marchen o tán atendiendo les llamaes de los hispanos de california.

xabel diz qu'una de les principales reformes que se ficieren depués de morrer el facista foi la d'introducir la progresividá fiscal, abandonábase'l porcentaxe xenéricu pa d'esa forma contribuyir al estáu en función de los ingresos de forma que'l que más ganara más aportara.
xabel diz que pasu ente pasu los diferentes gobiernos fueron retrocediendo hacia un sistema nel que les cobertures del estáu, la nación, distribúinse igual con independencia de los poderes de merca de la ciudadanía. medíes populistes qu'a la fin provienen d'impuestos que graven lo mesmo al que cobra 5 qu'al que cobra 10.
xabel diz qu'asturies, como esperimentu avanzáu de les polítiques del nuevu lliberalismu d'izquierda, pa que dicir llaboralismu, ye un de paises más avanzaos nesa xera. xabel diz alcordase del centimu de la gasolina, pa pagar les males tresferencies sanitaries; de los llibros de testu de baldre, pa los que la renta familiar seya de menos de 60.000€; del salariu básicu, bono a esto si-y queríen poner unes llendes presupuestaries ye normal yera pa los y les paries. y ye que como dicen nun artículu quo vadis, asturies.

xabel diz qu'hai unos díes, non munchos, alcontrábase con un collaciu sorriente porque izquierda xunida-ba-lva nun roblare'l pactu de gobiernu propuestu pola fsa. xabel diz que nesi momentu dióse cuenta de la estratexa que dende dalgunos grupos se siguíen, ensin iu-ba-lv nel gobiernu entovía más sitiu pa protestar.
xabel diz qu'hai menos díes charraba col que ye conceyal de llingua asturiana nun conceyu de les cuenques. esmolecíu, el conceyal, dicía qu'ensin tar nel gobiernu diba ser una xera bien abegosa algamar los fondos afayadizos pa siguir desenvolviendo polítiques de normalización llingüística, non solu nel so conceyu si non en tolos demás que les veníen desenvolviendo.
xabel diz que depués de les dos conversaciones cayó na cuenta de que dalgunos/es solu s'esmolecen por perder el so ámbitu, esti ye'l de la falta de voluntá de construyir, mientres qu'otra xente ta esmolecida polo que s'algamó, que nun foi poco, y lo que se va perder. preba de too ello ye la decisión de tini de suprimir les dos conseyeríes xestionaes por iu-ba-lv, mesmo que'l farón que dicía nel llibru de les tres relixones que mandare borrar el nome del que dicen llevó a los israelinos a la diáspora, naide más nun vuelva falar de laura y valledor dixo tini, arguyosu de caltener gobiernu hasta marzu de 2008.

xabel diz qu'esta selmana pesllaba l'últimu pozu del valle de turón; más de dos sieglos d'historia, de desenvolvimientu industrial, de riqueza, de sindicalismu, d'ideoloxía, de fuelgues, de vindicación, acoyida, escaezu y llárimes que pasen al maxín coleutivu del pueblu asturianu.
xabel diz que mientres n'asturies la minería pésllase, o sustitúyese pola inversión privada, n'europa atiéndese a la reflexón sobre'l futuru de los recursos enerxéticos, equí nun hai reflexón solo tranques. xabel diz que'l siguiente pozu ye la camocha, otru gran exemplu del trabayu coleutivu de los y les asturianes, asina pasín a pasín llévenmos al desaniciu dafechu de la única soberanía a la que podríemos aspirar, la enerxética.
xabel diz que siempre se sintió arguyosu de tener raigones nel valle turón, de qu'esos raigones axuntaren la viga travesá ayerana, de santibanes de la fonte, col ser cabraliegu. güei mira pal valle turón y non alcuentra más qu'ermu, espeyándose nelli'l futuru d'esti país, si nun reflexona sobre so mesmu.