xabel diz que dixo mao: "pal añu 2001, a entamos del siglu xxi, la china esperimentó cambeos entá mayores. va ser un poderosu país industrial socialista. y asina ha ser".

xabel diz que depués de tiempu d'autoesperimentación na llectura de blogs decantóse por facer entraes con menos lletres y más enllaces.

xabel diz que esti titular podría ser real n'asturies de nun cambiar les coses: "una llingua menos".

xabel diz que mal lo van llevar los pitos monteses, si ye que-yos puede dir peor, pa llegar hasta escocia como anuncia na so edición de güei la voz de asturias. recuerda'l titular a aquella frase d'hasta que les ranes, que tamién lo pasen mal, críen pelo, y como tou'l mundu sabe'l pitu montés nun vuela, y cada día que pasa tien más posibilidaes de desapaecer, de nun correxise les actuaciones previstes pola fsa-psoe nes aries de poblamientu. la fundación seo/birdlife publica un perinteresante estudiu sobre la cuestión.

xabel diz qu'esta entrada númberu 301 faese na ciudá del non pasarán, esi glayíu, esi llema de resistencia cívica y democrática, republicana, col que madrid resistió la sabaxe envestida del fascismu. xabel diz que ye una casualidá facela nesti llugar de la meseta ibérica, nel que la ultraderecha lliberal, la que mancha'l nome del lliberalismu cívicu proclamáu ente los sieglos xviii y xix, arrasa con cualesquier avance social.
xabel diz qu'una de les más importantes llabores qu'esisten cuando se quier reflexar, dende un puntu de vista subxetivu, ye escuchar les conversaciones, imaxinar d'au ye la xente que ta sentada a la to vera, ya seya nel metro de madrid o nel tua de llatores. asina xabel diz que la señora d'enfrente del metro, tenía rasgos d'asturiana, que nun ye nin meyor nin peor pero ye, y espresiones llingüístiques asturianes, falaba ella del recorte de llibertá de la clas obrera, que coses cuando les sos traces identificábenla dafechu cola supuesta esperanza.
xabel diz qu'anque siga sintiéndose estranxeru nesta ciudá, que lo ye, poco a poco entama a vela como un espaciu agradable, quiciaves por tener equí más amigos que n'asturies, anque claro eses amistaes, como la señora de rasgos asturianos y lo que dicía, seyan lleendes urbanes.

xabel diz que llegó a eslovaquia un día depués de qu'esti país européu entrara dientro del alcuerdu schengen, polo que los sos ciudadanos pueden circular llibremente pel territoriu de la ue y d'otros paises non ue que tamién lu roblaron. esa tarde darréu quitar les fronteres austria decidió prohibir la circulación per 20 metros de la carretera qu'axunta los dos paises ente les 22 y les 06 hores, torgando asina la llibertá de movimientos que debiere dar esti tratáu, utilizando pa ello una feble escusa.
xabel diz que güei ta en frankfurt-hahn volviendo pa santander, pasa'l control d'equipaxes, nun ha amuesar la so documentación; cuando de la que diba pa bratislava si lo tenía que facer, ye más, hasta la terminal ye diferente. depués enllénse d'arguyu diciendo que toos somos europeos, toos colos mesmos derechos, y dalgunos hasta con más obligaciones y controles que los demás, la diferencia, polo que se diz ta nel tiempu d'adaptación, anque la realidá amuese que la europa occidental sigue mirando con temor, infundáu, al este.
xabel diz que la vieya europa sofre la so propia paranoia a convertise nel referente políticu mundial, representada en cuestiones como l'aprobación d'un tratáu de reforma institucional aprobáu a espaldes de la ciudadanía europea, refugáu'l primeru non polos símbolos si non poles polítiques antisociales derivaes del mesmu. xabel diz que bien parez que de la utopía d'una unión federal, política y ciudadana de los pueblos d'europa solo queden les povises escaecíes por unes polítiques nes que lo importante ye la llibre circulación del capital y non la construcción d'un espaciu de referencia na defensa de los derechos de la ciudadanía.

xabel diz que pel ventanu l'avión veía un pórticu que-y sonaba del tour, segundos depués veía la torre eifiel, y la catedral de notre dame, taba perenriba parís. xabel diz que quiciabes lo que más sorprenda de parís dende l'aire seya la ordenación urbana, estensible al restu de la república francesa.

xabel diz qu'un ratu depués arribó en frankfurt hahm, un aeropuertu que de tar migoya sería como'l d'asturies, pero como nun ta migoya agora ye ún de los más importantes d'europa na tema de los vuelos baratos, esos que cuesten menos que dir en alsa hasta cabrales. xabel diz que fuera ta frio pero dientro dientro tienen calefacción.
xabel diz qu'otra más de les sorpreses ye que a la hora de xintar por un solomillu y un llitru cerveza tostada, el solomillu taba bien rico, y un café grande, la nota 20,70€. nel aeropuertu de santander, provincia na que nun ta migoya, por un pinchu y una caña, de les de madrid, cóbrente cerca 7€, y el pinchu de conxelador. en fin que ta xabel más llibre n'europa qu'igual-y da por quedar.

xabel diz qu'esta selmana si hebo una noticia que na so dimensión superó al restu esa ye la de la eliminación del tren nocherniegu a madrid, esi col que se podía tar al alborecer paseando pela castellana, esi nel que por más que se pagara clase preferente la realidá yera de tercera, esi que daba un serviciu necesariu.
xabel diz que la progresiva implantación de la alta velocidá na península, siguiendo'l caducu modelu radial, ta trayendo bien de problemes, asina les más que necesaries inversiones nes redes de cercaníes queden pa prau y la llegada de les diferentes clases de páxaros conlleven la desapaición de los servicios conocíos como rexonales suponiendo esto un aumentu del preciu del billete.
xabel diz que nun hai munchos años qu'a esti tren espresu quitáben-y dellos vagones, el pesu económicu, poblacional y políticu d'asturies xustificaba aquello, la selmana qu'entra asturies, ún de los países nos que'l ferrocarril algamó mayores densidaes, pierde ún de los sos símbolos.

xabel diz que dicen los periódicos que n'asturies hai más chigres per habitante qu'en nenguna otra parte del estáu, cuestión ésta que nun ye otra más del nuesu fechu diferencial de necesidá de sociabilidá y de compartir el nuesu tiempu ociosu colos nuesos vecinos y vecines, nun espaciu que nun tea lloñe de la nuesa casa.
xabel diz que datos como ésti de los chigres nun son pa llevanos les manes a la cabeza nin nada paecío, constituyen puntos d'atención pa dalgunos conceyales d'urbanismu, ente los que detaca uviéu, miles de viviendes costruyíes en la corredoria, la carisa, la florida... ensin nenguna triba de serviciu públicu más allá de los megacentros comerciales.
xabel diz que tamién dicen los periódicos qu'asturies ye de los países con más densidá de grandes superficies comerciales, y eso que tán sólo nel centru, como la escuela de pagu y concertada. pel mediu queden les tiendes pequeñes, arrequexaes por horarios que torguen la so rentabilidá y viabilidá. el chigre de tola vida, nel que les pintes siguen siendo asturianes y non imperiales, como la tienda del barriu elementos a promocionar como vertebradores de la vida ciudadana d'esti país.

xabel diz que ve na prensa que la mocedá tien que dedicar dos tercios del so sueldu pa mercar una vivienda, una casa. la medria de los sueldos de la vivienda va provocando, pasu ente pasu, que poder exercer el derechu, negáu pol soe y pp, a la vivienda seya cada vegada más enfarragoso.
xabel diz que l'abandonu, provocáu poles doctrines neolliberales, sobre la vivienda, sobre'l suelu, provoca que les alministraciones en mui pocos casos puedan exercer aiciones conducentes a una regularización del accesu, asina como rebaxar los precios.
xabel diz qu'hai un tiempu, de la que se fizo la normativa asturiana del suelu, darréu xeneralizaríense los planes xenerales d'ordenación urbana, dalgunos conceyos, pocos, ficieron por enanchar los márxenes empobinaos a la construcción de viviendes con dalgún tipu de proteición, eses que non sólo se fain por mor d'abellugar a les clases con menor poder de compra sinon que tamién contribuín de mou directu a favorecer una baxada de los precios de la vivienda, mediante la promoción direuta o subvencionada, siempre baxo'l control del estáu, de les viviendes. introducir mecanismos de regularización, evitar que la plusvalía valga más que les persones.