xabel diz que pel ventanu l'avión veía un pórticu que-y sonaba del tour, segundos depués veía la torre eifiel, y la catedral de notre dame, taba perenriba parís. xabel diz que quiciabes lo que más sorprenda de parís dende l'aire seya la ordenación urbana, estensible al restu de la república francesa.

xabel diz qu'un ratu depués arribó en frankfurt hahm, un aeropuertu que de tar migoya sería como'l d'asturies, pero como nun ta migoya agora ye ún de los más importantes d'europa na tema de los vuelos baratos, esos que cuesten menos que dir en alsa hasta cabrales. xabel diz que fuera ta frio pero dientro dientro tienen calefacción.
xabel diz qu'otra más de les sorpreses ye que a la hora de xintar por un solomillu y un llitru cerveza tostada, el solomillu taba bien rico, y un café grande, la nota 20,70€. nel aeropuertu de santander, provincia na que nun ta migoya, por un pinchu y una caña, de les de madrid, cóbrente cerca 7€, y el pinchu de conxelador. en fin que ta xabel más llibre n'europa qu'igual-y da por quedar.

xabel diz qu'esta selmana si hebo una noticia que na so dimensión superó al restu esa ye la de la eliminación del tren nocherniegu a madrid, esi col que se podía tar al alborecer paseando pela castellana, esi nel que por más que se pagara clase preferente la realidá yera de tercera, esi que daba un serviciu necesariu.
xabel diz que la progresiva implantación de la alta velocidá na península, siguiendo'l caducu modelu radial, ta trayendo bien de problemes, asina les más que necesaries inversiones nes redes de cercaníes queden pa prau y la llegada de les diferentes clases de páxaros conlleven la desapaición de los servicios conocíos como rexonales suponiendo esto un aumentu del preciu del billete.
xabel diz que nun hai munchos años qu'a esti tren espresu quitáben-y dellos vagones, el pesu económicu, poblacional y políticu d'asturies xustificaba aquello, la selmana qu'entra asturies, ún de los países nos que'l ferrocarril algamó mayores densidaes, pierde ún de los sos símbolos.

xabel diz que dicen los periódicos que n'asturies hai más chigres per habitante qu'en nenguna otra parte del estáu, cuestión ésta que nun ye otra más del nuesu fechu diferencial de necesidá de sociabilidá y de compartir el nuesu tiempu ociosu colos nuesos vecinos y vecines, nun espaciu que nun tea lloñe de la nuesa casa.
xabel diz que datos como ésti de los chigres nun son pa llevanos les manes a la cabeza nin nada paecío, constituyen puntos d'atención pa dalgunos conceyales d'urbanismu, ente los que detaca uviéu, miles de viviendes costruyíes en la corredoria, la carisa, la florida... ensin nenguna triba de serviciu públicu más allá de los megacentros comerciales.
xabel diz que tamién dicen los periódicos qu'asturies ye de los países con más densidá de grandes superficies comerciales, y eso que tán sólo nel centru, como la escuela de pagu y concertada. pel mediu queden les tiendes pequeñes, arrequexaes por horarios que torguen la so rentabilidá y viabilidá. el chigre de tola vida, nel que les pintes siguen siendo asturianes y non imperiales, como la tienda del barriu elementos a promocionar como vertebradores de la vida ciudadana d'esti país.

xabel diz que ve na prensa que la mocedá tien que dedicar dos tercios del so sueldu pa mercar una vivienda, una casa. la medria de los sueldos de la vivienda va provocando, pasu ente pasu, que poder exercer el derechu, negáu pol soe y pp, a la vivienda seya cada vegada más enfarragoso.
xabel diz que l'abandonu, provocáu poles doctrines neolliberales, sobre la vivienda, sobre'l suelu, provoca que les alministraciones en mui pocos casos puedan exercer aiciones conducentes a una regularización del accesu, asina como rebaxar los precios.
xabel diz qu'hai un tiempu, de la que se fizo la normativa asturiana del suelu, darréu xeneralizaríense los planes xenerales d'ordenación urbana, dalgunos conceyos, pocos, ficieron por enanchar los márxenes empobinaos a la construcción de viviendes con dalgún tipu de proteición, eses que non sólo se fain por mor d'abellugar a les clases con menor poder de compra sinon que tamién contribuín de mou directu a favorecer una baxada de los precios de la vivienda, mediante la promoción direuta o subvencionada, siempre baxo'l control del estáu, de les viviendes. introducir mecanismos de regularización, evitar que la plusvalía valga más que les persones.

xabel diz que, lo mesmo que la tónica tien de ser schweppes y non d'esa nordic mist o como la quieran nomar, la política n'europa ha ser europea, esto ye una confrontación fonda de les idegues y ideoloxíes que conformen la nuesa sociedá, lo demás ye un simple xuegu mediáticu de lluces de collores guapes pero que non ayuden a avanzar hacia una sociedá meyor.

xabel diz que la puesta n'escena de la precampaña del primer ministru español zapatero al más puru estilu del partíu demócrata de los usa, de política tien poco y muncho d'operación trunfu. la ciudadanía europea pasa a ser una cenciella enviadora de sms que decide ente eliminar al candidatu a o b, dos opciones nes que la so calidá artística sobrepasa a la política.
xabel diz que la reciente incorporación de bill clinton, sí esi que nun firmó kioto, como al gore, pa sofitar a facer el programa del psoe, nun ye más que l'amuesa de que nel país européu cola derecha más americana, l'antigua socialdemocracia neolliberal, si ye qu'esti contradictoriu términu ye posible, termina por abrazar los postulaos demócrates americanos. xabel diz qu'ente ferres y roses, o alcahofes como l'amigu de frutos, ellí quédase coles lletres iu.

xabel diz que munches vegaes diz lo que nun tendría que dicir. asina güei nun tendría que dicir que la sumisión de la vicepresidenta española de la vega pa col vaticanu ye una cuestión que trae alcordances d'otros tiempos. una sumisión publicada nel día que se llucha contra la violencia de xéneru, que na mayor parte de los casos conlleva la sumisión forzosa.
xabel diz qu'al mesmu tiempu que de la vega poníase un rodillu na tiesta, n'asturies sancionábase a un mozu por non quitar la gorra pa dir a clas. y nel restu del estáu entama, o continua, un alderique venceyáu a la vestimenta relixosa nos espacios públicos, lo que mos lleva otra vuelta más a la sumisión impuesta dende los patriarcaos, y nesti casu nun ye'l de constantinopla, pronúnciese estambul.
xabel diz que quiciaves de los primeros pasos qu'hai que dar p'algamar, pa romper les cadenes de la opresión, seya amuesar que la ciudadanía siéntese llibre, llibre en tolos sentíos, hasta pa decidir los modelos económicos, que nel fondu costituyen los principales grilletes de la nuesa esistencia como lo qu'habemos ser ciudadanos y ciudadanes.

xabel diz que pasaba perehí, como l'aute esi que tanto-y presta al electropedagogo, per esi perehí que ye l'internet buscando anuncies relacionaes con eslovaquia. como l'aute tampoco pudo resistise a nun llamar cuando lleía que facer un manual d'historia conxuntu pa hungría y eslovaquia diba ser enforma difícil... por aquella cuestión de que los húngaros ocuparen política y militarmente durante cientos d'años, y eso ha quedar reflexao.
xabel diz que la iniciativa sigue'l modelu francu-alemán qu'hai un tiempu decidieron compartir un llibru sobre la historia de los dos países. una propuesta interesante de cara a la configuración d'un modelu de ciudadanía europea que supere los marcos establecíos polos estaos nación.
xabel diz qu'eso mesmo bien pudiere pasar con portugal y l'estáu español, un modelu que yá se plantegara nesti espaciu. sicasí, teniendo en cuenta'l respetu col que nos llibros d'historia española se traten a les diferentes naciones que componen l'estáu español, posiblemente l'obxetivu d'axuntar acabara notra demostración del nacionalismu castellanu, esi qu'un bon día decidió vivir d'espaldes a portugal y al restu d'europa.

xabel diz qu'hai unos meses, depués d'años de reflexón, tomó una decisión que camentaba diba-y cambiar la vida, mercar un mac. lo de cambiar la vida yera más nada que pol mieu a nun tener programes o la compatibilidá de dalgunos ficheros, les bases de datos del ms access solu son compatibles col windows. pasáu'l tiempu la esperiencia, amás de productiva, ye más que bona, los programes son fáciles d'atopar, los cracks lo mesmo, igual lo único ye que nun hai bayura de xuegos, anque pa eso ta'l pc. la distribución ubuntu de linux ehí sigue tamién dando bona utilidá.
xabel diz que lleva unos meses siguiendo los diferentes programes pa ver la televisión pel ordenador, ente los que destaquen joost y zatoo, esti últimu autollendáu a una riestra canales estatales a les que sumen la tv polaca y la francesa tv5, con una calidá de video y audio aceptables anque la ufierta seya enforma escasa. l'otru ye joost, que sí tien una ufierta ablucante, cola ventaya de que la programación ta grabada, en delles canales. otra podría ser channel chooser, una páxina que garra directamente la señal de les televisiones, como zatoo pero con milenta canales.
xabel diz que solu tien un problema, que nun ye d'elli, la conexón a la banda ancha, a la febra óptico de telecable, que si hai unos años yera revolucionaria anguaño quédase más que probe, y pagar págase abondo. y ye que con una xiga ye difícil disfrutar de les nueves canales de comunicación.

xabel diz que lleva un tiempu grande ensin escribir, nun ye dicir gran cosa pero dalgo y dalgo, y eso que coses pasen, otra cuestión ta na voluntá de sentase pa escribir más allá de daqué borrador que nun va dir a nengún siitiu.

xabel diz que nesti casi mes que lleva ensin escribir prebara a lo facer de munches coses dende l'actitú colonialista del rei español, anque españa nun tuviere colonies porque tenía provincies d'ultramar, de la separación de la fia mayor del rei d'españa.
xabel diz que tamién pudo escribir más sobre la campaña de gaspar llamazares, que bona esa tarde de miércoles, que pudo escribir sobre'l boletín del pce del día 15 nel que se-yos escaeció dicir que ganó llamazares, que marga nun ganó, y ellos perdieron. xabel diz que pasó'l tiempu y nun escribió, poco importa, ye un ciclu, igual mañana aparez otra entrada.

xabel diz qu'hai un tiempu dixo que'l so blog nun yera un campu de marte, que yera un espaciu nel que amosaba les sos reflexones sobre diferentes cuestiones que podíen incidir en dalgún grau na sociedá, más les cuestiones sobre les qu'escribe xabel que la opinión de xabel.
xabel diz que como cualesquier persona con un mínimo d'información conoz el prósimu mes cellébrense les primeres elecciones primaries n'izquierda xunida, una organización política na que milita xabel y que tien más d'un millón de votos nel conxuntu del estáu; anque'l resultáu electoral nun se vea reflexáu pola dispersión y repartu de representantes congresuales; esto ye unes elecciones nes que se va decidir la voz política d'un énte que tendría más población qu'asturies.
xabel diz que de los dos candidatos sólo conoz a ún, a gaspar llamazares, conoz la so aición, la so política y la so defensa de los intereses d'asturies y de la clas trabayadora, amosaes bien d'ocasiones mesmo na so etapa n'asturies, cola defensa de los derechos llingüísticos sobremanera o nel espaciu sindical de les comisiones obreres, la defensa de los valores republicanos... xabel diz que cuando mande la papeleta va facelo pensando n'asturies, pensando nel socialismu, na lliberta y el federalismu, va facelo por gaspar.