xabel diz que'l presidente areces debe pasar munches nueches a la duermevela, y a xabel nun-y estraña porque parez-y normal que tea asina. esti vienres el presidente d'asturies ordenó parar los glayíos pro derechos llingüísticos, como la xente siguía mandó que metieren a la pita dientro la llechera. y como ficiere stalin con troski l'anuncia nunca se publicara en nengún mediu de comunicación, asina esto que xabel acaba dicir nunca nun pasó.
el domingu en la nueva españa entrugában-y a álvaro cuesta, madrileñu ensin derechu a votu n'asturies y númeru 1 del psoe por asturies, pola oficialidá -en referencia a una hipotética negociación con iu del estatutu d'autonomía- retrucando'l señor cuesta "la cooficialidad no es una demanda ciudadana. ni garantizaría un mayor desarrollo ni generaría grandes emociones en la ciudadanía..." diz xabel que lo que nun garantiza desarrollu, nin xenera esperances, son les vueses polítiques de desactivación del texíu industrial del país; y afirma xabel qu'a elli si-y diba xenerar esperances, amás d'un reconocimientu de los sos derechos como ciudadanu.
xabel agora va sentase a ver si la fsa sigue supeditando los inetreses de partíu a los intereses d'asturies. habrá unanimidá na defensa de la construcción d'un centru de parapléxicos en llangréu? o la fsa siguirá diciendo que la sanidá ye un mal gastu inncesariu; y que se pue facer n'otros llugares. y esi centru, lo mesmo que la oficidalidá, sí xenera ilusión n'asturies.

xabel representa la mente d'areces intentando pensar como la mitá de la población d'asturies:

(areces nun pue pensar como la mitá de los y les ciudadanes d'asturies. areces nun sabe, nin quier saber, asturianu.)

xabel diz qu'anguaño una organización política, cultural, de cualesquier xera que tenga espaciu web y nun lu actualice da la imaxe de ser un ente muertu, o que ta a poco morrer. anduvo d'abril de navegando xabel pente delles webs de partíos políticos del país y les últimes actualizaciones a18 d'abril de 2006 son les que vienen darréu: andecha astur (8/03/06), ésta ufre la posibilidá de ganar un cruceru si dexes que s'abran los ventanos medrantes; bloque por asturies (11/01/06); izquierda asturiana (14/04/06); izquierda xunida de xixón (18/04/06); partíu popular d'asturies (7/04/06); la de la fsa-psoe ye una cosa d'otru mundu, o d'otru país. la fsa-psoe nun tien muncha falta de vendese pel internet, votos tienlos nun puñu, pero estraña la falta d'interés del partíu de la participación de simpatizantes nos asuntos, ya información, telemáticos na actualización del so sitiu web.
xabel diz que nun entiende lo de los y les defensores de la democracia col casu de palestina, depués d'unes elecciones llibres y observaes por delegaciones intenacionales de les que resulta vencedor la formacion h.amas la ue decide retirar los sofitos económicos a l'autoridá nacional palestina y l'estáu israelí fae lo mesmo, anque tea obligáu a ello. israel anuncia que va continuar colos asesinatos selectivos, esto ye que nun tienen intención de crear víctimes colaterales nun principiu, ante l'atentáu d'estos díes reivindicáu por grupos de lliberación nacional palestina. xabel nun entiende porqué nun se desenvuelven les resoluciones de naciones xuníes n'israel, estáu que como la españa de franco tamién participa n'eurovisión.
xabel diz que la noticia de qu'areces va volver a presentase a les elecciones asturianes, del 27 de mayu de 2007, ye pa pensar si los y les asturianes fuimos, somo, tán malos y males.

xabel diz que por muncho que s'esfuercen, o faigan facer que s'esfuercen, los y les polítiques siguen teniendo los periodos vacionales como époques nes que facer o desfacer, anque sía pa bien, acciones referentes al gobiernu.
el xueves 6 d'abril salía l'anuncia de qu'el conseyeru de xusticia, relaciones exteriores y seguridá pública d'asturies, garcía valledor destituía al director xeneral de seguridá, cabezaleru de la corriente siempre crítica d'ix d'asturies, críticu col gobiernu del que formaba parte, que siempre se negara a abandonar el puestu y qu'acaba d'impugnar l'últimu congresu del partíu comunista d'asturies ente'l comité federal del partíu comunista d'españa; la cosa ye algamar ensin la mayoría'l poder. reconoz xabel que la paciencia del conseyeru ye grande porque hai que tenela p'aguantar más de dos años a dalguién que te ta poniendo zancadielles ensin parar. sustitúi a de asís fernández ramón argüelles que fuere portavoz municipal d'izquierda xunida en l.lena.
el vienres 7 d'abril salía l'anuncia de qu'el presidente del gobiernu español, rodríguez zapatero, modificaba'l gobiernu moviendo a josé antonio alonso suárez d'interior pa defensa y entrando mercedes cabrera calvo-sotelo como ministra d'educación, marcha maría jesús san segundo dos díes depués d'aprobase la llei orgánica d'educación. sal del gobiernu español josé bono, antigüu ministru de defensa y expresidente de la ccaa de castilla la mancha pa dedicase a atender a la familia. como ministru del interior incorpórase alfredo pérez rubalcaba.
l'analís del periódicu más vendíu, y lleíu, n'asturies bien podría ser qu'españa vuelve a tar gobernada por asturianos/es. la vicepresidenta fernández de la vega ye de familia asturiana, cabrera calvo-sotelo lo mesmo y pérez rubalcaba ye un brañeru de ribeseya de los de primero de letizia de llanes de los de siempre. la cosa ye que n'asturies eso nun val pa nada mientres continúen nel poder persones como álvarez areces y la so camarilla.

pasó xabel la mañana delantre la xunta xeneral del principáu d'asturies esperando a que llegara'l director del ente de radio y televisión asturiana, que tenía comparecencia a petición del grupu popular, entro'l señor pela puerta d'atrás; asustáu, quien sabe, por diez defensores d'un ente que s'esprese vehicularmente nel idioma del país. alcordóse xabel de dalgún presidente autonómicu, bon collaciu de la tortiella, que na inauguración de dalgún centru educativu hebo facer lo mesmo, y con ello d'aquella frase, o rima, del chavo del ocho "ahí viene el perro arrepentido, con las orejas tan gachas, con la mirada perdida, el rabo entre las piernas, ahí viene el perro arrepentido, con las orejas tan gachas, con la mirada perdida, el rabo entre las piernas, ahí viene el perro arrepentido, con las orejas tan gachas, con la mirada perdida, el rabo entre las piernas" acababa diciendo federico "ah ya cállate, cállate, callate que me desespeeeras". y ye que nun se puede permitir que los y les representantes públicos nun tengan el valor d'apaecer ente la ciudadanía. el control de la clas política nun pue quedar relegáu a periodos de cuatro años, ha facese nel día a día.
xabel supo, depués, que la rtpa va tener emisiones per satélite, na era d'internet escaécenla polo que paez, pa que los y les emigrantes asturianos puedan ver la tele de tini. xeneralista, de producción esterna, menos los informativos, con poques películes, con muncho fútbol (. una tele como les demás. amúrniase xabel en ver la poca perspectiva del gobiernu, cuando podíen facer un mediu innovador faen lo que saben copiar, y mal.
xabel nun teniendo más pallabres qu'agregar a esta entrada decide asoleyala a la lluz d'internet. síganme los/es bonos/es.

xabel diz que la propuesta del conseyu de los diputaos español pa entamar una negociación cola organización separatista vasca eta, aprobada por tolos partíos ellí representaos cola escepción del partíu, supón un perbón puntu de partía pa la resolución del conflictu militar y políticu. sicasí los constantes ataques por parte de les instituciones del estáu español hacia los diferentes movimientos de la izquierda patriótica vasca nun son más que pilancos nun procesu que yá tenía que tar resueltu va munchos años, y que nun fain más sinon que lu prolongar indefinidamente.
xabel diz que siente repulsa de les pallabres del ¿defensor? del pueblu español; falar de vencedores y vencíos, cuando la solución tien de llegar por un alcuerdu, del que la sociedá vasca sía la vencedora en tolos ámbitos. espera xabel que la persona escoyía pa la procuradoría xeneral d'asturies nun sía un cainita pol estilu. quieren a una persona, que sofriera'l terrorismu directamente, como defensor(a) del pueblu, qué-yos paez eduardo madina?
xabel acaba ver que tini foi a ver a pepe a la moncloa. la única información que tien xabel, pel momentu, ye que ye la segunda visita d'areces a zapatero en dos años y que la primer vegada tuvo acompañáu por directivos de la fundación príncipe(sa) d'asturies y que l'añu pasáu jose luís anduvo per asturies. polo que paez areces nun imitó al so colega santanderín al entrar en palaciu.

xabel diz depués de los fracasos de los parques temáticos: eurodisney, terra mitica, la cartuja, port aventura y asina un llargu etcétera d'intentos que solu algamaron la ruina. decídese'l presidente areces a anunciar que dientro pocu asturies va convertise nun mega parque temáticu, como les güelgues dinosauriu pero a lo grandonón que ye lo que presta n'asturies.
xabel camienta que l'antoxana tien de ser un caleyina d'aldega, d'eses que fieden a cuchu y quesu cabrales con gusanos perende, con música de vicente diaz (que vende discos enforma) y vaya dando entrada a tolos componentes de l'asturies de la que tan orgullosu debe tar el presidente areces. castilletes de recuerdu, madreñeros muertos; vies muertes, cortes vacies; cuatriada, celta y palma, bowling cola oronda tiestona, montes comíos, castros movíos... mantes enllenes discos nomaos "ansina h.abló cabrales"-"cabrales ancient tongue, the way they spoke", "asina faló oviedo/uviéu"-"oviedo's ancient tongue, the way they spoke", "asina falou tineo/tinéu"-"tineo's ancient tongue, the way they spoke", "así hablan asturias y logroño"-"how asturias and logrono speaks"; videos de la productora de programes sobre les esfoyaces del muséu del pueblu d'asturies...; imáxenes virtuales de mules tordes. y pa llegar que meyor que dir pela "minera" de la camocha a pumarabule.
xabel piensa que foi una bona pena qu'areces nos sos años de militancia comunista nun marchara pa la unión soviética y se quedara per siberia en daqué gulag. o que nos sos años d'estudiante en santiago nun quedara ellí faciendo carrera política. o por qué nun quedó pagando'l peaxe del güerna. non, tuvo que venir p'asturies pa dicir que quier qu'asturies sía un parque temáticu. sabiendo la cara que tien igual hasta ye capaz de dicir qu´"asturies muerta" va traer a munchos y munches de los y les emigraes qu'anden agora trabayndo poles atracciones d'esos megacentros ¿d'ociu? y consumismu.
diz anxo quintana, parafraseando a manolo rivas, que gallegu ye quien quiera ser gallegu. diz xabel que cada día que pasa se-y quiten les ganes de siguir siendo asturianu, total pa compartir sitiu con paca y tola da-y lo mesmo ser que nun ser. pero tamién sabe xabel que si nun fuera asturianu nun podría ser xabel, y egocéntricamente niégase a ello.

puxa asturies!, pero la viva

diz xabel que a areces un día d'estos van marcha-y cola siella y elli va siguir cola cara de siempres, con esa sorrisa sempiterna provocada pola inxesta somática, de los mundos felices de huxley. güei marchen pa barcelona caxes de documentación, incautada pol exercitu franquista na guerra española, ente eses caxes hailes tamién de documentación asturiana. diz el gobiernu que yá les tienen microfilmaes y con eso ye abondo, propón-yos xabel que microfilmen los sos despachos con ellos dientro y los manden de postal pa les prósimes pascues. nun diba haber muncha diferencia respectu al llema turísticu d'asturies paraísu natural. pol´ticos de sorrisa de cartón piedra pa un país de cartón piedra.
xabel diz qu'una de les coses que más-y presta de les nueches d'uviéu ye'l poder la torre de la catedral dende casi tolos puntos de la ciudá antigua. sabe xabel que nun ye la so torre prefería, pero conténtase. espera xabel l'apertura del muséu d'historia d'asturies, sabe que de xuru nun van volver poner aquellos suelos de madera qu'al caminar facíen un ruidu que recordaba otros suelos de madera d'otres vivencies.
diz xabel que mientres el mundu ta asustáu coles burbuyes tecnolóxiques, la última n'españar esta selmana en xapón, nel estáu español la burbuya inmobiliaria nun fai más qu'hinchase hasta que llegué'l momentu del españíu pola subida de los tipos d'interés. n'asturies amás del españíu de la vivienda vendrá l'otru gran españíu cuando s'acaben los fondos pa les les carreteres y autovíes que nun lleven a nenguna parte.

dobrý večer