xabel diz qu'esta selmana na que'l gobiernu del principáu d'asturies va gastar cientos de miles d'euros nun macrofestival de música nel que la presencia de grupos asturianos ye mínima, igual teníen qu'entamar a reflexonar sobre les ayudes que dan a la música, y a la cultura, asturiana.
lo que diz xabel vien tamién a cuentu de la solicitú de la fsa a la sociedá uvieina de festexos (últimu párrafu de la noticia) pa que se faiga un homenaxe a ígor y carlos que bien que lu merecen, pero mala tierra esta na que pa que se te reconoza'l to trabayu tengas que tar muertu. los musicos n'asturies necesiten, entre otre munches coses, más sofitu de les instituciones asturianes, por exemplu'l mesmu que da pa facer el derrame rock, o p'aquel festival de la vaca que costaba 480000€ y que nunca más volvería a pasar per asturies.
xabel diz que según pasa'l tiempu'l realismu máxicu de macondo aseméyase cada vegada más a asturies, la última ye la propuesta de facer un tranvia dende avilés al aeropuertu. y asina van les coses nesti país onde la primer ocurrencia sienta catedra electoral.

xabel dixo que taba en cama por mor del gripe, non el de los y les páxares sinon pola versión común y a la que toos y toes yá tamos avezaos. poro xabel pasó un día d'encierru na so celda, como hai unos años la definiera'l gran electropedagogo, anque esta vegada acompañáu por una televisión con cuarenta canales y decenes de películes nel discu duru del ordenador. pasó'l día ensin pena nin gloria, viendo episodios repetíos de los simpsons y documentales sobre l'orixe de la vida; cuando echaron la meyor película del día xabel tenía sintonizada euronews, de la que baxaba pa la fox. la conclusión qu'algamó xabel ye que non por munchos canales la televisión ye meyor.
xabel púnsose a lleer el país del domingu de pe a pa o de pa a pe, porque tiempu túvolu asgaya, paróse nes anuncies que-y llamaren l'atención, como fai cualquiera, como que la presidenta del goviernu de la comunidá autónoma de madrid, esperanza aguirre (la que ta interesada nel ave), salió corriendo de la concentración de víctimes del 11m pa dir a la concentración de víctimes xeneralistes, rajoy diba detrás d'ella como alma que lleva'l diañu. noticies como que eduardo zaplana pidía saber quienes yeren los autores del 11m, cómo ellos nunca nun governaren!!. lleía un artículu onde se dicía que les mentires de tanto les repetir acaben paeciendo verdaes, nunca la mentira puede ser verdá, y el pp ta faciéndolo qu'hasta paez, pola repercusión y l'encuestes, que la estratexa ta saliendo-yos rentable.
el vienres al subir a un bus n'uviéu vio xabel una fueya de firmes pa pidir que n'uviéu se faiga'l muséu de los premios príncipe. niemeyer, arquitectu brasileñu, autor d'edificios emblemáticos como la sé del partíu comunista francés, l'humanité... presentó una maqueta d'un edificiu que nel uviéu de calatrava y gabino diba desentonar pola so gracia estética, y poro por qué nun facer n'avilés un espaciu cultural que revitalice la villa muerta de les reconversiones industriales. museos, n'asturies, hailos asgaya, pero continentes de prestancia estética que pague la pena dir a velos hai bien pocos. caro ta que xabel nun firmó la fueya.