xabel diz que la facilidá de los medios de comunicación pa entitular una noticia o entrevista na que l'asturianu apaeza de refilón ye inaudita, y nos más de los casos inesplicable. asina nuna entrevista al diariu el comercio el presidente de la fade diz que "El bable no es ninguna prioridad para los asturianos" depués hai un silenciu, anque acaba dando la tradicional fórmula de naide nun lu fala na cai (fórmula descartada poles encuestes sociollingüístiques del gobiernu asturianu).

camienta xabel, qu'hasta hai tres minutos taba sollerte a les obres d'al llau so casa, qu'un bon titular de la entrevista podría ser que l'empresariáu asturianu, y internacional, diba entamar a cumplir los convenios, les normatives de seguridá, los horarios llaborales... pero eses cuestiones nun apaecen na entrevista... anque l'estrevistáu nun fuera nin sociólogu, llingüística sinon presidente de la fade y de la cámara de comerciu d'uviéu.
xabel diz que si cuando se quier facer una casa y nun hai planos ye difícil facela, si cuando tas faciendo unos planos y dalguién te los moya, o estropia, alcordaráste de dalgunes coses pero igual les vigues mayestres pónesles onde nun van. n'asturies nun se mira pa los planos pa facer país, n'asturies mírase pa otros planos pa mantener l'actividá como col sable facer castiellos. la verdá perder el tiempu pa escribir obviedaes.

xabel suaña munches vegaes conque'l so país, asturies, sía un estáu como los escandinavos. esti miércoles lleendo el país atendía pa esta noticia que fizo que xabel suañara ser ciudadanu escandinavu.
pero xabel pa más de cuatro quintes partes de la humanidá ye obxetu d'envidies y miles de persones arrieguen la so vida pa poder vivir como nós. xabel podría garrar un avión y tar en noruega en menos de 12 hores amuesaría'l so pasaporte y buscaría trabayu, ensin tener que mirar p'atrás, de contino, por si hubiere axentes d'inmigración perende. otres persones pa vivir meyor échense a la mar y con once puntos de gps lleguen a les playes de barbate onde suenen les sirenes como canta chambao.
un grupu de parllamentarios/es europeos/es acaba proponer que la unión europea faiga una condena del franquismu. en francia un xuez condena a la empresa nacional de ferrocarriles por collaborar nel tresporte de seres humanos a los campos d'esterminiu. n'uviéu izquierda xunía propón la supresión de los símbolos franquistes y el pp retruca qu'esi debate yá ta superáu. xabel camienta que dao qu'esiste una llei de partíos políticos igual yera bono reformala pa que los que siguen obviando'l xenocidiu franquista, anque colos deos cruzaos, hubieren condenar la dictadura que fizo que'l reló de la ciudadanía se parara demientres cuarenta años, nel meyor de los casos pa otros nunca nun más pudo volver funcionar.

xabel diz qu'una de les coses que más lu asusten ye la de dir de viaxe, anque sólu sia pa un día o dos, poro cuando marcha faelo cerca de casa, d'asturies, y nun aveza salir lloñe del dominiu llingüísticu, non porque tenga problemes pa defendese n'otros idiomes si non por mor de querer apreciar les semeyances, y diferencies, cismontanes pa coles tresmontanes.
xabel un domingu, cualesquier valdría anque fuere esti, decidióse a dir pelos val.les de l.luna, babia, l.laciana... lo primero no que se decató foi na amplitú de los mesmos, recuerda xabel qu'elli cabraliegu con trescientos metros d'anchor el un valle yá ye enforma ampliu. caleyaba peles cais y via que toes teníen nome, y qu'a diferencia de n'asturies los nomes yeren los que'l pueblu siempre dixere. sintía falar y yera asturiano. lleía les piedres fundacionales de les ilesies y en toes un elementu común, el nome de dalgún obispu d'uviéu o de dalgún abad del monasteriu de corias.
depués de falar con xente mozo, de los llugares onde paraba, siempre quedaba’l mesmu tastu de la emigración xuvenil, les alcordances de los años de mocedá n’uviéu, xixón... les ganes de volver a asturies, porque la so exa cultural nun ta nin en valladolid, nin en llïón, la exa de la so vida ta equí, nel país de los 78+10 conceyos. xabel de la que volvía alcordábase del cantar de el maniegu qu'entonara dixebra...

l.laciana asturiana
babia asturiana
oseya asturiana
de tous ya pa tous

xabel diz que col debate de la alta velocidá (española) del tren vuelven a surdir los debates de los mil bables y la dificultá d'entendimientu de los y les asturianes si nun recurren a recursos foriatos. fundamenta xabel esta afirmación nos múltiples localismos del país, que nun ayuden a resolucionar los problemes del país sinon que los enquisten y toa propuesta de resolución ye vetada por parte del localismu. depués de casi venticinco años d'estatutu d'autonomía la cohesión indentitaria n'asturies nun esiste, y preba d'ello ye'l debate sobre'l tren d'alta velocidá que, supuestamente, aportará en 2010 al país: tres paraes nun radiu de trenta quilómetros y con tiempos actuales de venti minutos per carretera y trenta pela via nun paez que tengan munchu xacíu. xabel nun alarde de localismu, desconocíu hasta la fecha, diz qu'elli quier un apeaderu na h.uente del corral (primera h.uente de puertas, cabrales).
xabel vio l'anuncia de que los hosteleros, y vecinos/es, de la plaza del paragües quieren facer de la plaza un puntu d'alcuentru cultural de la zona vieya d'uviéu. como veceru de la plaza xabel sofita la propuesta entendiendo que son necesarios espacios afayadizos pal alcuentru. claro que nun tou'l mundu piensa como xabel, y los que dicen que la opera ye la única espresión cultural que paga la pena (xabel agora ta col live at royal albert hall de the who) yá tan protestando. nun entiende xabel por qué envede mercar el pisu na zona antigua nun fueron pa les caldes o pa ules o pa dalguna cueva lloñe de la ciudá y los ruidos.
y agora pos nada a esperar porque vengan de madrid a solucionanos los problemes, qu'equí col cuentu los bables nun hai cristo que s'entienda.

xabel dixo que taba en cama por mor del gripe, non el de los y les páxares sinon pola versión común y a la que toos y toes yá tamos avezaos. poro xabel pasó un día d'encierru na so celda, como hai unos años la definiera'l gran electropedagogo, anque esta vegada acompañáu por una televisión con cuarenta canales y decenes de películes nel discu duru del ordenador. pasó'l día ensin pena nin gloria, viendo episodios repetíos de los simpsons y documentales sobre l'orixe de la vida; cuando echaron la meyor película del día xabel tenía sintonizada euronews, de la que baxaba pa la fox. la conclusión qu'algamó xabel ye que non por munchos canales la televisión ye meyor.
xabel púnsose a lleer el país del domingu de pe a pa o de pa a pe, porque tiempu túvolu asgaya, paróse nes anuncies que-y llamaren l'atención, como fai cualquiera, como que la presidenta del goviernu de la comunidá autónoma de madrid, esperanza aguirre (la que ta interesada nel ave), salió corriendo de la concentración de víctimes del 11m pa dir a la concentración de víctimes xeneralistes, rajoy diba detrás d'ella como alma que lleva'l diañu. noticies como que eduardo zaplana pidía saber quienes yeren los autores del 11m, cómo ellos nunca nun governaren!!. lleía un artículu onde se dicía que les mentires de tanto les repetir acaben paeciendo verdaes, nunca la mentira puede ser verdá, y el pp ta faciéndolo qu'hasta paez, pola repercusión y l'encuestes, que la estratexa ta saliendo-yos rentable.
el vienres al subir a un bus n'uviéu vio xabel una fueya de firmes pa pidir que n'uviéu se faiga'l muséu de los premios príncipe. niemeyer, arquitectu brasileñu, autor d'edificios emblemáticos como la sé del partíu comunista francés, l'humanité... presentó una maqueta d'un edificiu que nel uviéu de calatrava y gabino diba desentonar pola so gracia estética, y poro por qué nun facer n'avilés un espaciu cultural que revitalice la villa muerta de les reconversiones industriales. museos, n'asturies, hailos asgaya, pero continentes de prestancia estética que pague la pena dir a velos hai bien pocos. caro ta que xabel nun firmó la fueya.

xabel preocúpase, y muncho, pola futura televisión asturiana; anque discute l'asturianidá de la mesma si ésta nun se desenvuelve vehicularmente n'asturianu; piensa nos programes que va tener la xeneralista cadena autonómica y camienta que tien de se facer dalgo pa crear puestos de trabayu, más allá de los 100 directos y 200 directos anunciaos. una televisión llatina tien de cuntar con programes de prensa roxa, asemeyaos al diariu de patricia o a la hora d'ana rosa, pero con protagonistes asturianos. una bona cantera de personaxes alcontraríamoslos en programes como rumbo a la fama y dalgún otru qu'haya pel país, siempre y cuando estos programes tengan subvención del goviernu asturianu. la tele mala diba selo, pero polo menos tendríemos una tele mala braeramente.
xabel alégrase cuando los políticos caltienen los alcuerdos nel tiempu, y sobremanera cuando esos alcuerdos son referentes al usu de la llingua prohibía. la conceyalía de mocedá d'uviéu entama, otra temporada más, el programa d'ociu alternativu la nueche ye tuya. la nueche ye tuya ye una alternativa al ociu que desenvuelven les asociaciones, n'especial les xuveniles, uvieínes les fines de selmana. si hai un puntu a resaltar d'esti programa ye la so xestión y control público; lloñe d'otros modelos qu'anguaño nun son más qu'empreses a les que l'alministración autonómica sofita y sofita.
xabel retírase pa pensar nel antroxu de cuaresma qu'impón el goviernu municipal uvieín, pp, qué pasaría coles raices cristianes? ú les dexaron?

¿a quién no le maravilla
ver en su gloria, sin tasa,
que es lo más ruin de su casa
doña blanca de castilla?
mas pues que su fuerza humilla
al cobarde y al guerrero,
poderoso caballero
es don dinero.
francisco quevedo

dobrý deñ

xabel entrugóse qué pasó col movimientu antiglobalización, altermundialista, que tantu puxu algamó hai unos años? quedó reducíu a aquellos aconceyamientos en respuesta a los aconceyamientos de los foros económicos establecíos? sigue latente? establecióse nos conceyos del foru social mundial? quedó reducíu a una serie d'alcuentros más o menos folclorizantes nos que los nuevos llíderes de la esquierda mundial anuncien los sos proyectos de futuru? ú aquel black block qu'aterrorizaba a la bona sociedá, que nunca nun viera una papelera quemada, y del que naide nun sabía la identidá nin los intereses que defendía? ú el movimientu ciudadanu attac? ú les esperances de tanta xente n'otru mundu posible?
caleyó xabel una mañana de domingu pel centru d'uviéu, como nun lo facía dende hai polo menos diez años, prestó-y ver los puestos de llibros de vieyu y eses coses qu'hai alredor de el fontán. sicasí tanta xente concentrada en tan pocos metros ye dalgo que descoloca a un xabel, avezáu anguaño a llugares con poca xente y seles.
xabel diz que con ovidio tien de ser difícil decidíse hasta pa dir pañar duros, un de los primeros "políticos" en pidir la reforma del estatutu p'asturies, agora ye un de los políticos que más dicen que nun hai falta. nun hai quien t'entienda ovidió, y si tienes los resultaos que tienes nun ye porque sías un procer de la oratoria sinon porque lo que tienes en frente ye tan........(adxetive'l/la llector/a) que nun sería d'estrañar que'l to partíu, o quien sabe si tu mesmu, llegare a "dirixir" esti país.
dobru vêcer